Сæ пайда кæныны тыххæй ЦИПУ-йы арæзт æрцыдысты практикон ахуыртæ
Æнæпилотон аппаратон системæтæ систы æфсæддон цæттæдзинады ахсджиаг хай. Сæ пайда кæныны тыххæй ЦИПУ-йы арæзт æрцыдысты практикон ахуыртæ. Специалисттæ, уыдон та уыдысты сæрмагонд æфсæддон операцийы архайджытæ, студенттæн раргом кодтой сæ практикон фæлтæрддзинад. Фидæны æфсæддонтæн ахуыртæ хорз фадат дæттынц дæсныйады тыххæй ногдзинæдтæ базонынæн. Æнæпилотон системæты операторты куыд цæттæ кæнынц, уый тыххæй радзурдзæн Чехойты Фатимæ.
Пульты раз хуымæтæг инструктортæ не сты, фæлæ æфсæддон фæлтæрддзинад кæмæ ис, ахæм специалисттæ. Æнæпилотон системæтæй пайда кæныны тыххæй мадзал арæзт æрцыдис ЦИПУ-йы æфсæддон центры чысыл авиацийы минæвæрттимæ. Æвзарæн пункты офицер Къусраты Георгийæн æнæпилотон техникæ æнæзонгæ нæу. Запорожьейы *рдыгæй уæззау цæф куы фæцис, уæд уый фæстæ сфæнд кодта йæ фæлтæрддзинад раргом кæнын, æфсæддон службæ кæнын кæй хъæуы, уыдонæн. Къусраты Георгий лæгдзинады тыххæй хорзæхджын æрцыдис «Намысы майданæй».
Студенттæн мадзал сси хорз фадат æнæпилотон системæты куыстимæ практикон æгъдауæй базонгæ уæвынæн. Кæд æмæ ахуырадон программæйы дæр ис æнæпилотон тæхæг аппаратты дисциплинæ, уæддæр æфсæддон службæмæ æвзарæн пункты инструктортæ равдыстой куысты хицæндзинæдтæ хæстон уавæрты. Фидæны æфсæддонтæ ацы ахуырты, службæ кæныны агъоммæ базонгæ сты дæсныйадимæ æмæ хъæугæ фæлтæрдтимæ.
Службæ кæнын контрактмæ гæсгæ чи равзара, уыдон райсдзысты сæрмагонд цæттæдзинад. Ахуыртæ цæудзысты 3 мæйы дæргъы, фæуыдзысты фæлварæнæй. Аттестацийы хатдзæгтæм гæсгæ сын лæвæрд æрцæудзæн паддзахадон сертификат, кæцы дæтдзæн æнæпилотон системæтæн разамынд дæттыны бар. Службæ æнæпилотон системæты æфсады чи равзара, уыдонæн арæзт цæудзысты уæлæмхасæн разæнгардгæнæн фадæттæ.
Æнæпилотон системæты оператортæ суæвын кæй фæнды, уыдоны курдиæттæ кæнынц фылдæр. Хъахъхъæнынады министрады æвзарæн пункты куыд фехъусын кодтой, уымæ гæсгæ ацы къабаз чи равзара, уыдон сæрмагонд ахуырты фæстæ æрвыст æрцæудзысты æнæпилотон авиацийы æфсадмæ. Афтæ, хæстон фæлтæрддзинад кæм ис, уыдоны зонындзинæдтæ систы фидæны специалистты ахуырадон программæйы хай.
