Инспекцийы архайджытæ æркастысты медицинон куыстуæтты уавæрмæ, федтой кусæн æрмæгæй æмæ хостæй куыд ифтонг сты, уый.
Æппæтуæрæсеон адæмон фронты эксперттæ, волонтертæ æмæ журналисттæ бабæрæг кодтой Мæздæджы районы амбулаторитæ æмæ фельдшерон-акушерон пункттæ. Инспекцийы архайджытæ æркастысты медицинон куыстуæтты уавæрмæ, федтой кусæн æрмæгæй æмæ хостæй куыд ифтонг сты, уый. Объектты фылдæр хай сты кæлæтдзаг кæнæ та базилинаг. Винограднæйы фельдшерон-акушерон пункт хъæуы сцалцæг кæнын. Къуылымпыдзинæдтæ дзы ис дондзæуæн системæйы куысты дæр. Станицæ Терскийы амбулаторийы бæстыхайы сæр дæр тæдзгæ кæны, уы тыххæй цар афазтæ. Инвалид адæмæн дзы сæ бон асинтыл схизын нæу, нæй сын дзы уавæртæ. Бындуронæй цалцæггæнинаг у Дæллаг Малгобекы медицинон пункт дæр. Рейды архайджытæ аныхас кодтой бынæттон цæрджытимæ. Адæм фылдæр хъаст кæнынц амбулаториты специалисттæ кæй нæ фаг кæны, уымæй. Амæй размæ, æнæниздзинадхъахъхъæнынады министр Годжысаты Тамерлан загъта, 2024-æм азы онг Цæгат Ирыстоны æппæт фельдшерон – акушерон пункттæ ногæй рацараздзысты, æмæ ифтонггонд æрцæудзысты хъæугæ кусæнгæрзтæй.