Ацы аз программæ «Ахуырад» æххæст кæнгæйæ, сцалцæг кодтой физкультурæйы 7 кабинеты
Æппæтуæрсеон адæмон фронты активисттæ сбæрæг кодтой, хъæуккаг скъолаты спортивон залтæ куыд арæзт цæуынц, уый. Ацы аз программæ «Ахуырад» æххæст кæнгæйæ, сцалцæг кодтой физкультурæйы 7 кабинеты. Уæвгæ, хъæутæн уыдон хуымæтæг спортивон залтæ не сты, фæлæ фæсивæд кæм æмбырд кæнынц, ахæм центртæ. Афтæ, кæд Цыколайы цалцæггæнæн куыстытæ хъæуы фæтагъддæр кæнын, уæд Црауы та цæттæ сты дуæрттæ байгом кæнынмæ. Æхсæнадон кусджыты инспекцион балцы тыххæй бæстондæр радзурдзæн Касаты Наирæ.
Дондзæуæн æмæ хъармгæнæн системæты уавæр, кусæнгæрзтæ фаг кæныныц, æви нæ, уый сбæрæг кæнын, стæй дзы хи найæнтæ ис, æви нæ? Скъоладзаутæ физузкультурæйæ кæм архайынц, уыцы залтæ хъуамæ уой æппæт нырыккон домæнтæм гæсгæ конд. Сывæллæттæ се спортивон цæттæдзинад кæм фидардæр кæнынц, уыцы залтæ сбæрæг кодтой Æппæтуæрæсеон адæмон фронты эксперттæ. Райдыдтой Цыколайы 3-æм скъолайæ. Ам спортивон зал цалцæггонд цæуы бындуронæй.
Цалцæггæнæн куыстытæ ног ахуыры азмæ фæуыдзысты æви нæ, уыцы фарста баззади гомæй. Фæлæ, подрядон организаци зæрдæ бавæрдта, куыстытæ æмгъуыдмæ кæй фæуыдзысты, уымæй.
Црауы спортивон зал у цæттæ, хъæуы ма йæ уæгъд æфснайд ракæнын. Ам æппæтуæрæсеон адæмон фронты минæвæрттæ фиппаинаг æрхастой хъармгæнæн системæмæ. Батарейтæ цæмæндæр гæсгæ разындысты протекторты фæстæ. Уый та ууыл дзурæг у, æмæ хъарм залмæ цæудзæн къуылымпытыимæ.
Гыццыл куыстытæ ма хъæуы Уæллаг Бирæгъзæнджы спортивон залы дæр. Залмæ бауагътой хъармгæнæн системæ. Ифтонг у æппæт хъæугæ кусæнгæрзтæй. Хъæуы ма дзы пъолыл нысантæ скæнын.
Активисттæ сбæрæг кодтой æмæ аргъ скодтой аварион рацæуæнтæн дæр. Иу спортивон залы проекты дæр пандустæ нæ уыди. Æппæт ацы аиппдзинæдтæ хъæуы аиуварс кæнын. Мониторингы хатдзæгтæ арвитдзысты республикæйы ахуырады æмæ наукæйы министрадмæ.
Ацы аз программæ «Ахуырад»-ы фæлгæты се спортивон залтæ сцалцæг кодтой 7 хъæуккаг скъолайы. Уыцы залты бындурыл фæнд кæнынц спортивон клубтæ саразын, цæмæй объекттæ фæсивæды тырнын кæной спортивон бæрзæндтæм.
