Ирыстойнаг спортсментæ дзы сæхи æнтыстджынæй равдыстой
Æрæджы Кемеровойы уыд Уæрæсейы чемпионат дзюдойæ. Ирыстойнаг спортсментæ дзы сæхи æнтыстджынæй равдыстой. Хуыздæртæ суæвын сын æххуыс кæны тренер Дзукъаты Инал. Йæ хъомылгæнинæгтæ ерысты цавæр хатдзæгтæ равдыстой, æмæ сæхи ног турниртæм куыд цæттæ кæнынц, уый тыххæй радзурдзæн Хъайтмазты Дзерассæ.
Æрыгон спортсментæ цымыдисæй кæсынц, Уæрæсейы чемпионкæ дзюдойæ Зураты Зæлинæ куыд тренировкæ кæны, уымæ.
Йе спортивон фæндаг сыгъзæрин майдан райсынмæ æнцон нæ уыд, фæлæ бирæ азты куыст ын радта, пьедесталы уæлдæр къæпхæнмæ схизыны фадат. Зæлинæ хæцы, бæрзонддæр конкуренци кæм ис, уыцы уæзы категоритæй иуы – 63 килограммы онг. Фæлæ чызг фидарæй рамбылдта Уæрæсейы чемпионаты æппæт фембæлдтыдтæ. Финалы ирон дзюдоисткæ сæххæст кодта хатдзæггæнæн фæлтæрæн æмæ сси хуыздæр.
Æнтыстджын спортивон карьерæйы рецепт хуымæтæг у. Йæ бындуры ис æрдзон курдиат. Уымæ бафтау дисциплинæ, фæразондзинад æмæ бирæ сахатгай тенировкæтæ. Сусæг ингредиент та у – фæлтæрдджын мастер, ног спортивон стъалы ссудзын кæмæн бантысдзæн, ахæм. Зураты Зæлинæйæн ахæм тренер у Дзукъаты Инал. Йæ разамындæй 12 азы тренировкæ кæны. Уымæн бантыст гыццыл Зæлинæйы гæнæнтæ фенын. Фæлтæрдджын тренеры æххуысæй рæстæгимæ Зæлинæ райдыдта иу хæрзиуæг иннæйы фæдыл æмбулын.
Йæ фароны бæрæггæнæнтæ фæхуыздæр кодта æмæ дыккаг бынат бацахста Кадзаты Арсен. Рæдыдтытыл лæмбынæг бакуыстой, фæлæ æвзист майдан дзюдоисты зæрдæ нæ райын кæны. Арсен снысан кодта дарддæры куыст. Тренеримæ фæнд кæны йæ техникæ ноджыдæр фæхуыздæр кæнын, цæмæй иннæ аз бæстæйы хуыздæр суа.
Ивгъуыд турнир Къæбысты Азаматæн йæ карьерæйы сси æппæтæй стырдæр. Дзюдоист фыццаг хатт архайдта бæстæйы чемпионаты æмæ йын уайтагъд рауад æнтыстджын. Рамбылдта бронзæ майдан. Фæнд кæны, йе *мвæзад ма фæныллæгдæр кæнын æмæ æрмæстдæр хуыздæр бæрæггæнæнтæ æвдисын.
Ныридæгæн ирон дзюдоисттæ сты тренировкæгæнæн æмбырдты Сочийы. Уым спорстментæ сæхи цæттæ кæндзысты иннæ ерыстæм.
