Ерысты республикон къæпхæн та уыдзæн 16 майы Барбашовы фæзы
Сывæллæтты æдасдзинадæн хорз фæрæз. Куыд æрвылаз, афтæ та ныр дæр республикæйы цæуы Æппæтуæрæсеон конкурс «Æдасдзинады цалх». Ныр уал, Ирыстоны районты цæрджытæ, сæ арæхстдзинад фæлварынц сæхи хсæн. Хуыздæртæ та сæ районы кад хъахъхъæндзысты республикон къæпхæны. Æрæфы районы Фæндæгтыл æдасæй цæуыны инспекцийы хъæппæрисæй куыд арæзт æрцыд конкурсы къæпхæн, уый федта Сосранты Жаннæ æмæ йын бакæсæм йæ сюжетмæ.
Ацы скъоладзаутæ æрвылаз тынг зæрдиагæй сæхи фæцæттæ кæнынц фæндаггон змæлды æвзонг инспекторты Æппæтуæрæсеон конкурс «Æдасдзинады цалх»-мæ. Ерыстæ райдайынц командæты сæргълæуджытæ цæттæдзинады рапортæй, районы фæндæгтыл æдасæй цæуыны инспекцийы хайады сæргълæууæгæн. Æстæм аз уыцы хæс æххæст кæны Сакъиты Альберт. Æрæфы районы ерысты ацы аз бацархайдта авд командæйы. Уыдон уыдысты алы хъæуты скъолаты минæвæрттæ. Алчи дæр дзы архайдта хуыздæр зонындзиндтæ равдисыныл фæндагыл цæуыны æгъдæуттæ зонынæй.
Ацы сабитæ, æнæмæнг, сæхæдæг дæр æмæ сæ алфамбылайы цы кæстæртæ уа, уыдоны дæр фæрæдийын кæй нæ бауаддзысты фæндагыл цæуыны фæтк фехалын, уый гуырысхойаг нæу. Æрæфы районы мидхъуыддæгты министрады хайады сæргълæууæг, булкъон Годзойты Вячеславы ныхæстæм гæсгæ ахæм мадзæлттæ кæнын хъæуы. Сæ ахадындзинад, бæрæг у. Азæй азмæ фæндæгтыл сывæллæттимæ баст фыдбылзтæ къаддæр кæнынц.
Фæндаггон змæлды æвзонг инспекторты Æппæтуæрæсеон конкурс «Æдасдзинады цалх»-ы сæйраг нысан у практикон æгъдауæй сывæллæтты арæхстдзинад фенын. Цы къæпхæнтæ йæм хаст сты, уыдон та сты æнæмæнг зонгæ алы адæймагæн дæр. Хъæуты скъолаты минæвæрттæ теоретикон æгъдауæй дæр дзуæппытæ радтой анкетæты фарстатæн. Конкурсы æнæкъуылымпы цыдæн, Цыколайы фыццæгæм скъолайы, арæзт æрцыд æппæт уавæртæ дæр. Йæ архайджыты ахуыргæнджытæ тынг разыйæ баззадысты æрвылазон конкурсы сарæзтæй.
Ацы мадзал цымыдисаг рауайы, районы хицауады, ахуырады управленийы æмæ Цæгат Ирыстоны мидхъуыддæгты министрады Æрæфы районы хайады æмгуыстады фæрцы. Мадзалы кадджын уазджыты хсæн уыд Æрæфы районы администрацийы сæргълæууæг Лагкуты Омар. Йæ ныхæстæм гæсгæ, æрвылхатт цæттæ вæййы ахæм хъæппæристæн фарсхæст раттынмæ.
Сывæллæттæ зæрдиагæй фæархайынц æппæт ерысты, фæлæ тынгдæр фæтагъд кæнынц велосипедыл цыдæй хи равдисынмæ. Ам сын ис кæрæдзийы æнтыстдзинадыл бацин кæнын, стæй кæрæдзийæн фарсхæст радтыны фадат.
Ерысты æппæт къæпхæнты рацæугæйæ сывæллæттæм æнхъæлмæ кастысты бæрæгбоны фынгтæ. Цалынмæ æвзонг инспектортæ фæллад уагътой, уæдмæ та жюрийы уæнгтæ биноныгæй банымадтой æппæт архайджыты бæрæггæнтæ дæр æмæ скодтой кæронбæттæн хатдзæгтæ. Цыппар къæпхæны дæр бæрæггонд æрцыдысты хуыздæртæ. Схорзæхджын сæ кодтой майдантæй, кады гæххæттæй æмæ зæрдылдарæн лæвæрттæй. Конкурсы æртыккаг бынатмæ рацыд Хæзныдоны скъолайы командæ, дыккæгтæ систы Сечеры скъоладзаутæ, фыццаг бынты аккаг зонындзинæдтæ та равдыстой Цыколайы 3-æм скъолайы ахуырдзаутæ. Уæлахиздзаутæм æнхъæлмæ каст зынаргъ лæвæрттæ, кубоктæ æмæ майдантæ.
Афтæмæй сбæрæг фæндаггон змæлды æвзонг инспекторты Æппæтуæрæсеон конкурс «Æдасдзинады цалх»-ы республикон конкурсы Æрæфы районы кад чи хъахъхъæндзæн уыцы командæ. Ерысты республикон къæпхæн та уыдзæн 16 майы Барбашовы фæзы.
