Йæ архайджытæ уыдзысты нæ бæстæйы хуыздæр рауагъдадты минæвæрттæ
Æртæ бонмæ Дзæуджыхъæуы Сабырдзинады проспект суыдзæн сывæллæтты æмæ фæсивæды Дыккаг фестиваль «ПроЧтение»-йы фæз. Йæ архайджытæ уыдзысты нæ бæстæйы хуыздæр рауагъдадты минæвæрттæ. Фестивалы программæйы уыдзысты чингуыты продукциты равдыстытæ-армукъатæ, сывæллæттæн чи фыссы, уыдонимæ, стæй нывгæнджытимæ æмæ иллюстратортимæ фембæлдтытæ. Уымæй дарддæр дзы уыдзысты лекцитæ æмæ семинартæ, ног чингуыты презентацитæ, музыкалон æмæ театралон равдыстытæ, тематикон дæсныйадæвдисæг ахуыртæ. Фестивалы архайджытæ уыдзысты автортæ æмæ фысджытæ, чингуыты рауагъдадты кусджытæ, дуканитæ, библиотекæтæ, скъолатæ, уæлæмхасæн ахуырады центртæ. Чингуыты фестивалы фæзтæ кусдзысты Вахтанговы хæдзар-музейы дæр. Фестивалы кадджын уазæг уыдзæн поэтессæ Плиты Николь. Мадзалы хъуамæ архайой 15 мин адæймаджы — скъоладзаутæ, студенттæ, ныййарджытæ, педагогтæ æмæ библиотекæты специалисттæ. Фестиваль арæзт цæуы Дзæуджыхъæуы администрацийы хъæппæрисæй, уæрæсейаг рауагъдадты æххуысæй.
