Студи фæзынд Тæбæхсæуты Балойы номыл Ирон академион театры хъæппæрисæй
Æвзонг курдиæттæм æнхъæлмæ кæсынц Ирон театры скъола-студийы. Студи фæзынд Тæбæхсæуты Балойы номыл Ирон академион театры хъæппæрисæй. Уыдзæнис дзы 3 къорды. Алкæцыйы дæр фæйнæ 15 архайæджы. Адæймаджы уды аивадон дæсныйад куы уа, уæд æй йæ сабибонтæй хъæуы æргом кæнын, зæгъынц ирон театры, æмæ уымæ гæсгæ исынц 7 азæй 10 азы онг, 11 азæй 14 азы онг, æмæ 15 азæй 17 азмæ кæуыл цæуы, ахæм сывæллæтты. Кæй зæгъын æй хъæуы, ахæм студитæ тынг хъæугæ сты. Се руаджы раргом вæййынц æрыгон курдиæтты дæсныйæдтæ æмæ царды фæндаг раст равзарынц. Сценæйы сусæгдзинæдтæ сын æргом кæндзысты ирон театры актертæ. Постановкæтæ уыдзысты куыд ирон æвзагыл, афтæ уырыссагыл дæр. Нырма уал студимæ æмбырд кæнынц сывæллæттæ, ахуыртæ та райдайдзысты фыццæгæм октябры. Цæмæй архайджытæн æнцондæр уа, уый тыххæй аразынц къаддæр сценæ. Кæй зæгъын æй хъæуы, уавæртæ хорз куы уой, уæд куыст дæр хуыздæр цæуы, ома фылдæр спектакльтæ æвдисдзысты.
Уалыты Гиви, Ирон театры аивадон разамонæг: «Сывæллæтты ам ахуыр кæндзысты актерон дæсныйадыл, зарыныл æмæ кафыныл. Нæ ахуыртæ уыдзысты иронау. Уронау дзурын хорз у, фæлæ чи нæ зоны, уыдоны дæр сахуыр кæндзыстæм. Чи зоны, нæ ахуырты фæстæ сывæллонæй рауайдзæн дæсны сценограф. Фæкæсдзыстæм æм, цæмæй дарддæр уæлдæр ахуырад райса æмæ сомбон Ирыстонæн пайда æрхæсса. Нæ студийы архайджытæ кæд иууылдæр сæ цард аивадимæ не сбæттой, уæддæр се ппæты дæр рæсугъддзинадыл сахуыр кæндзыстæм. Нæ куысты уый сæйрагдæр у. Архайджытæй дарддæр йæ цард аивадимæ сбæттын кæй бафæнда, уымæ æнæхъæн театрæй æххуыс кæндзыстæм.
