Уый тыххæй дзырдтой Хицауады æмбырды
Афæдзы кæронмæ Мамысоны коммæ тоннель ратдзысты эксплуатацийы. Йæ дæргъ – 500 метры. Сцæттæ ма уыдзысты 2 хиды Дзуарыхъæу-Фыййæгдоны фæндаджы хайы. Уый тыххæй дзырдтой Хицауады æмбырды. Ныридæгæн сцалцæг кодтой Хъобан-Хъæрмæдоны фæзилæнæй Хъæнийы онг фæндаджы хайы 11 километры. Афæдзы кæронмæ ма фæнд кæнынц фæуын Дыгургоммæ автомобилон фæндаджы реконструкци. Мацутæйæ Комы-Арты онг уаццаджы куыстытæ кæронмæ фæвæййынц. Фæндаджы дæргъ у 21 километры. Реконструкцийæн радих кодтой 860 милуан сомы. Æппæт фæндæгты хæрзхъæддзинадæн гарантийы æмгъуыд у 5 азы. Цавæрдæр къуылымпыдзинæдтæ куы рабæрæг уой, уæд сæ арæзтадон организаци йæхи хыгъдæй раст кæндзæн.
Æмбырды ма æркастысты, аварийон службæты ирвæзынгæнджытæн æрвылмæй фиддонты тыххæй уынаффæйы проектмæ. Йæ бæрц уыдзæн 14 мин сомы. Фæллойы æмæ социалон рæзты министрады ма бахастой, бюджетон фæрæзтæ 4 милуан сомæн фæфылдæр кæныны фæндон. Уыдон хардзгонд æрцæудзысты адрисон социалон фиддонтыл. Хицæнæй æркастысты Херсоны облæсты цæрджытæн æххуысы мадзæлттæм. Проектмæ гæсгæ нысангонд æрцæудзæн иурæстæгон фиддон 100 мин сомæн исбон балхæнынæн, стæй ма райсын социалон фиддонтæ цæрæнуат балхæнынæн.
