Йæ нысан у физкультурæ æмæ спорты къабазы дæсны специалистты гыццыл хъæутæм раздахын
Афæдзы райдианæй Цæгат Ирыстоны царды уагъд цæуы паддзахадон программæ «Хъæуккаг тренер». Йæ нысан у физкультурæ æмæ спорты къабазы дæсны специалистты гыццыл хъæутæм раздахын. Программæйы хæстæ æххæст кæнын кæй бафæндыд, уыдонæй иу у хъæбысхæстæй тренер Кочиты Амур. Программæйы архайд хуымæтæг куыстыл нæ нымайы, фæлæ ахсджиаг хъуыддагыл. Бæстондæр хабæрттæ радзурдзæн Чехойты Фатимæ.
Хъæбысхæсты залы — Кочиты Амур ног хуызы. Профессионалон спортсмен — æппæтуæрæсеон æмæ æппæтадæмон чемпионатты уæлахиздзау, ныр хæрзиуджытæ райсыныл архайдзæн тренер уæвгæйæ. Йæ куысты бындур — ерысты бирæазон фæлтæрддзинад, æмæ тренировкæтæ республикæйы иугонд командæимæ. Амур у программæ «Хъæуккаг тренер»-ы архайæг. Кусы Октябрскæйы 1-æм спортивон скъолайы. Йæ ныхæстæм гæсгæ, йæхицæн дæнцæгæн нымайы йæ зондамонæг Биазырты Марикы.
Амуры разамындæй цы спортсментæ тренировкæтæ кæнынц, уыдон сты 2 къорды. Иутæ ахуыр кæнынц гауызыл фыццаг къахдзæфтæ кæнын, иннæттæ та фылдæр кæнынц сæ дæсныйад. Секцимæ кæй фæнды, уыдонæн ныр дæр ма ис фадат бацæуынæн. Тренерæн йæ куыст хуымæтæг дæсныйад нæу. Хоны йæ ахсджиаг хъуыддаг, уымæн æмæ йæ хæсыл нымайы сбæрæг кæнын алы сывæллоны хъомыс, æмæ йе спортивон фæлтæрддзинад чемпионты ног фæлтæрæн раргом кæнын. Амур республикæйы се *ппæтæй раздæр сси программæ «Хъæуккаг тренер»-ы архайæг.
Ног хъæуккаг тренеры кусгæйæ федта республикæйы физкультурæ æмæ спорты министры хæстæ рæстæгмæ æххæстгæнæг Фрайты Сослан. Уый тренировкæтæн аргъ скæнынæй уæлдай, аныхас кодта æрыгон спортсментимæ.
Программæ «Хъæуккаг тренер»-ы алы архайæг дæр райсдзæн фиддон. Фæллойадон контракты рæстæг 5 азæй къаддæр нæу. Профилон министрады куыд фехъусын кодтой, афтæмæй фидæны проект суыдзæн, республикæйы районты 50 мин адæймагæй къаддæр кæм цæры, ахæм хъæуты сывæллæтты спорты рæзтæн ахсджиаг фæрæз.
