Педагогтæн раарфæ кодтой Цæгат Ирыстоны Сæргълæууæг Сергей Меняйло стæй ахуырады æмæ наукæйы министр Алыбекты Эллæ
Ахуыргæнæджы боны кадæн сывæллæтты театр «Саби»-йы арæзт æрцыд кадджын мадзал. Сæ профессионалон бæрæгбоны фæдыл педагогтæн раарфæ кодтой Цæгат Ирыстоны Сæргълæууæг Сергей Меняйло стæй ахуырады æмæ наукæйы министр Алыбекты Эллæ. Сæ куысты сгуыхтдзинæдты æмæ профессионалон архайды фæдыл нæ республикæйы сгуыхт ахуыргæнæджы ном лæвæрд æрцыд 12 педагогæн. Уымæй дарддæр Цæгат Ирыстоны ахуырады сгуыхт кусæджы ном амæй фæстæмæ кадимæ хæсдзысты 5 адæймаджы.
Йæ арфæйы ныхæсты Сергей Меняйло куыд загъта, афтæмæй ахуыргæнæджы фæллойæн аккаг аргъ скæнын зын у. Регионы разамонæг фæсидт ахуырады министрмæ, цæмæй бæстон бакусой ахсджиаг фарстайыл. Бæлвырддæр та – цæмæй сгуыхт ахуыргæнджыты уæлдай гæххæттытимæ кусын мауал хъæуа, ууыл.