Ахуыргæнæг æмæ хъомылгæнæджы афæдзы фæлгæты ЦИПУ-йы фембæлд уыди ирон æвзаг æмæ литературæйы ахуыргæнджытæ æмæ ирон филологийы студентты фембæлд. Педагогтæ фæсивæдæн радзырдтой мадæлон æвзаг парахат кæныны инновацион фæлтæрддзинады тыххæй. Мадзал бабæрæг кодта Чехойты Фатимæ дæр, æмæ йын ныхасы бар.
Ацы фембæлд арæзт æрцыд, 2023 аз Уæрæсейы хицауад ахуыргæнæг æмæ зондамонæджы номыл кæй расидт, уый фæдыл. Дыууæ ахуыргæнæджы Къадзаты Мæдинæ Мызуры скъолайæ æмæ Боциты Альбинæ Цæлыччы скъолайæ бæстонæй радзырдтой сæ куысты цавæр ног технологитæй пайдæ кæнынц, уый тыххæй. Сæ фæлтæрддзинад, æнæмæнг, пайда у куыд иннæ ахуыргæнджытæн, афтæ райсом скъолатæм кусынмæ чи бацæудзæн, уыцы æрыгæттæн. 4-æм æмæ 5-æм курсонтæ та сæ хъуыдытæ рахастой нырыккон урочы фæрæзты фæдыл.
1933 азы байгом Цæгат Ирыстоны паддзахадон педагогон институты ирон филологийы факультет. Уæдæй нырмæ цал æмæ цал æрыгон лæппу æмæ чызджы райстой ам уæлдæр ахуырад. Нырыккон фæлтæры минæвæрттæ дæр тырнынц арф зонындзинæдтæ исынмæ.
Ныртæккæ факультеты ахуыр кæны 150 курдиатджын студенты. Се *хсæн ис, литературæйы фыццаг къахдзæфтæ чи кæны, ахæмтæ. Æрыгон фысджытæн сæ уацмыстимæ базонгæ уæвæн ис периодикон мыхуыры. Сæ профессионалон фæндаг ирон филологийы факультетæй æрмæст чызджытæ нæ райдыдтой. Ацы аз фыццæгæм курсмæ бацыдысты 18 лæппуйы дæр. Студенттæ ныридæгæн разы сты сæ фидæны дæсныйадæй. Æвзаргæ дæр æй, скъолайы ахуыргæнгæйæ ракодтой.
Саухалты Валентинæ 32 азы дæргъы кусы ахуыргæнæгæй. Раст фыссын æмæ аив кæсын нæ мадæлон æвзагыл скъоладзауты ахуыр кæнын райдыдта, студент ма куы уыд, уæд. 2 азы бакуыста Кæрдзыны хъæууон скъолайы. Ныр 30 азы та у Дзæуджыхъæуы 3-æм скъолайы ирон æвзаг æмæ литературæйы ахуыргæнæг.
Ацы фембæлдæй рауад ирон æвзаджы бон. Ам баиу сты фæлтæрддзинад æмæ нырыккон дуджы ногдзинæдтæ. Уыдонæн та иумæйагæй сæ нысан у ирон æвзаг æмæ литературæйы уроктæ цымыдисагдæр скæнын.
