Скодта йæ ахуыргæнæндоны рауагъдон Кадиты Сослан, ацы куыст у йæ дипломон проект
Аивадон училищæйы байгом кодтой Дзанайты Азанбеджы бюст. Скодта йæ ахуыргæнæндоны рауагъдон Кадиты Сослан. Ацы куыст у йæ дипломон проект. Æдæппæтæй ацы аз училищæйы нывкæнынады хайад каст фесты 7 рауагъдоны. Цы фæлтæрддзинад райстой, уый бацархайдтой сæ дипломон куыстыты равдисын. Бæлвырддæр хабæрттæ радзурдзæн Хъайтмазты Дзерассæ.
Хуыцауы фæлгонц четæныл рухсы фæрцы равдисын. Калоты Екатеринæйы кæттагыл зæдты цæсгæмттæ, стæй рухс æмæ аууоны цымыдисаг хъазт. Æрыгон нывгæнæджы сфæлдыстады чырыстон темæ сæрмагонд бынат ахсы. Ууыл дзурæг сты йæ дипломон проекттæ дæр.
Аивадон училищæмæ бацæуыны размæ Хосаты Аслан ахорæнтæй никуы ныв кодта, пайда кодта æрмæст кърандæстæй. Йæ куыстытæн фæлгонцтæ лæппу иста йæ райгуырæн Суададжы. Йæ дипломон проект дæр уымæн æвдисæн.
Ацы куыст Аслан скодта 18 бонмæ. Хæстоны сæр 3 хатты ивта. Йæ ныв у 2 метры бæрзæндæн æмæ 2 метры фæтæнæн. Ахæм стыр куыст скæнын æй нæ къуылымпы кодта. Фæлтæрддзинад æм ис – ныв кодта планетарийы къултæ. Йæ дипломон проект саив кæндзæн ветеранты советы къул.
Дзанайты Азанбеджы фыццаг бюст йæ номыл училищæйы кæрты кæй фæзынд, уый символикон нысан у. Нывгæнджытæ йæ скодтой хи фæрæзтæй.
Бюсты автор у училищæйы студент Кадиты Сослан. Дзанайты Азанбеджы ном ын рагæй зонгæ у – йæ сабибонтæй йæ адæмон нывгæнæджы сфæлдыстад дисы æфтыдта. 5-æм къласы райдыдта скульптурæтæ кæнын фæлварын. Уарзон нывгæнæджы фæлгонц сæнусон кæнын бæрнон хæс уыд, зæгъы Сослан. Мадзалы архайджытæ йын стыр аргъ скодтой.
Дипломтæ бахъахъхъæнгæйæ, училищæйæ рацыдысты 7 рауагъдоны. Алкæмæдæр дзы ис стыр фæндтæ, æмæ сæ къухы æнæмæнг бафтдзысты.
