Ацы сæрмагонд фæз архайын райдыдта куыстуат «Заповедная Осетия-Алания»-йы бындурыл
Алагиры байгом интерактивон мультимедийон центр. Ацы сæрмагонд фæз архайын райдыдта куыстуат «Заповедная Осетия-Алания»-йы бындурыл. Центры ис 9 экспозицион залы. Ис дзы Цæгат Ирыстоны сæйраг туристон маршруттимæ базонгæ уæвын, фæдзæхст территориты атмосферæ банкъарын, мингай азты размæ цы бынæттæ уыд, уырдæм абалц кæнын. Бæлвырддæр радзурдзæн Хъайтмазты Дзерассæ.
Ирыстон-Аланийы фæдзæхст бынаты дунемæ цымыдисаг балц райдыдта, 3 фæдзæхст зонæйы чи цæры, уыцы 3 цæрæгойы мультимедийон фæлгонцтæй. Дзæбидыр, зубр æмæ леопард рельефон интерактивон картæйыл æвдисынц, фæдзæхст бынат, заказник æмæ нацпарк кæрæдзийæ цæмæй хицæн кæнынц, уый. Æдæппæтæй центры ис 9 тематикон залы. Адæмы зонгæ кæнынц Цæгат Ирыстоны фыццагон æрдзимæ. Фыццаг музей бабæрæг кодтой республикæйы хицаудзинады оргæнты минæвæрттæ æмæ кадджын уазджытæ.
Алы тематикон зонæйы дæр бæрæг дары æрдзимæ иудзинад. «Цæрæгойты æмæ зайæгойты дуне»-йы залы ис интерактивон Сырх чиныг. Алы сыфыл дæр, Цæгат Ирыстоны цы стæм сырдтæ цæры, уыдоны тыххæй информаци. Ам сын ис фенæн сæ фæлгонцтæ дæр. Алцыдæр конд у æрдзон æрмæджытæй.
Гæнæн ис, æмæ милуангай азты размæ Кавказы территорийы уыдис рагон стыр денджыз Тетис. Уымæн æвдисæн – денджызон цæрджыты бирææнусон дургонд стæгдартæ. Ныр сты центры тæрхæджытыл. Историмæ арфдæр абалц кæнын æмæ Ирыстоны рельеф куыд ивта, уый базонын ис «Геологи æмæ палеонтологи»-йы залы. Ам уазджытæ зонгæ кæнынц информацион стендтимæ æмæ хъусынц экспертты интервьютæм.
Цæстыты раз ахæм ныв – арс тызмæгæй кæсы бæласыл æнахуыр предметмæ, тæппуд сагтæ хъавгæйæ хизынц уыгæрдæныл. Ныр та цъæх къуылдымтæ ивынц митæй æмбæрзт хæхтæ. Уый хæстæгмæ фенын арæх нæ бантысы. Къамахсæнты фæрцы гæнæн ис рæстæгмæ хъæддаг цæрæгойты цæрæн бынæттæм дуар байгом кæнын.
Технологиты руаджы сæрмагонд залы фенæн ис Цæгат Ирыстоны хуызтæ. Дисы æфтауынц, агъуысты 3Д эффектимæ цы экрантæ æвæрд ис, уыдон.
Уазджытæн центры бацæттæ кодтой, алы азты фæдзæхст æрдзон территоритæ чи иртæста, уыцы зындгонд ахуыргæндты тыххæй чи дзуры, ахæм стендтæ. Музейы коллекцийы ис сæрмагонд экспонаттæ. Зæгъæм, Павел Вейнбергы быдырон боныг æмæ зæронд техникæ.
Ныридæгæн алкæмæндæр йæ бон у центр бабæрæг кæнын. Хъæддаг æрдзы дунемæ бахауын æмæ рæстæгмæ иртасæг суæвын ис Алагиры, парк «Заповедная Осетия-Алания»-йы.
