Ацы хатт рæзгæ фæлтæр бацæттæ кодтой акъоппы цырæгътæ, сæмбырд кодтой хойрæгтæ æмæ алыхуызон хъæугæ дзаумæттæ
Алагиры районы скъоладзаутæ æмæ студенттæ радон гуманитарон æххуыс арвыстой сæрмагонд æфсæддон операцийы зонæмæ. Ацы хатт рæзгæ фæлтæр бацæттæ кодтой акъоппы цырæгътæ, сæмбырд кодтой хойрæгтæ æмæ алыхуызон хъæугæ дзаумæттæ. Ацы хъуыддаг æххæстгонд цæуы «Иугонд Уæрæсе»-йы акцитæ «Салдатæн зæрдæйы хъарм» æмæ «Æрвыстæг салдатæн»- æххæстгæнгæйæ. Бæлвырддæр радзурдзæн Хъайтмазты Дзерассæ.
9-æм къласон Кучиты Георгий ныр ацы куыст дæсныйæ æххæст кæны. Акъоппы цырæгътæ цæттæ кæнын сахуыр æфсæддон-патриотон клубы къорд«Арæнхъахъхъæнæджы æвзонг хæлар»-ы уæвгæйæ. Йе *мбæлттимæ æрмæст акъоппы цырæгътæ нæ цæттæ кæны, æмбырд кæнынц æрвыстæгтæ. Арæх лæппутæ æмæ чызджытæ фæфыссынц фыстæджытæ нæ хæстонтæн, цæмæй зоной, хæдзары сæм кæй æнхъæлмæ кæсынц, æмæ сыл кæй мæт кæнынц.
Ахæм зæрдæйы ахаст ам алкæмæдæр ис. Сæ размæ цы ахсджиаг хæс æвæрд ис, уый сæ разæнгард кæны. Ахæм акъоппы цырагъæн æнæрлæугæйæ йæ бон судзын у 8 сахаты онг. Уый аразгæ у, æвзонг арæнхъахъхъæнджытæ ацы хъуыддаг куыд раст сæххæст кæндзысты, уымæй. Арæх сæм фæкæсынц хъæды хæдзарады техникумы студенттæ. Волонтерты æрмадз 2 азы размæ фæзынд ацы ахуыргæнæндоны бындурыл. Ардæм æрбацæуынц иннæ скъоладзаутæ дæр, стæй хистæртæ дæр. Ам ахсджиаг у цавæрфæнды æххуыс дæр, се *ппæты дæр сахуыр кæндзысты.
Гуманитарон æххуысы радон парти ацы хатт æрвыст æрцæудзæн арæнхъахъхъæнджытæн Курскырдæм. Рæзгæ фæлтæр бацæттæ кодтой 350 акъоппы цырагъы бæрц æмæ цалдæр асыччы алыхуызон æрвыстæгтимæ. Æфсæддон-патриотон клубы къорд «Арæнхъахъхъæнæджы æвзонг хæлар»-ы бархионтимæ хистæр арæнхъахъхъæнджытæ фыццаг аз нæ кусынц.
Гуманитарон æххуыс æрвыст цæуы «Иугонд Уæрæсе»-йы акцитæ «Салдатæн зæрдæйы хъарм» æмæ «Æрвыстæг салдатæн»- æххæстгæнгæйæ. Ацы хъуыддаг Алагиры районы æдзух æххæст кæнынц.
Рæзгæ фæлтæр цæттæ сты ацы хъуыддаг æнæрлæугæйæ æххæст кæнынмæ, цæмæй æрмæст сæрмагонд операцийы зонæйы алы хæстонæн йæ бон уа уазал æхсæвты йæхи батавын æмæ æнæмæнг хæдзармæ æрыздæхын.
