Аныхас дзы кодтой экономикон рæзты министрады специалисттæ æмæ бизнесментæ
Амалхъомдзинады бон центр «Мой бизнес»-ы арæзт æрцыд ахсджиаг фембæлд. Аныхас дзы кодтой экономикон рæзты министрады специалисттæ æмæ бизнесментæ. Сæйрагдæр фарста – амалхъомдзинадæн æххуысы æмбæлгæ мадзæлттæ. Бизнес-æхсæнады рæзт у нæ республикæйы социалон-экономикон рæзты хицæн комплексон программæйы ахсджиагдæр проекттæй иу. Йемæ æмрæнхъ лæууынц агропромышленнон комплексы, туризмы æмæ логистикæйы къабæзтæ дæр.
Амалхъомдзинады управленийы минæвæрттæ æмæ Дзæуджыхъæуы инвестицион проектты специалисттæ куыд бафиппайдтой, афтæмæй амалхъом адæм активонæй пайда кæнынц бизнесæн æххуысы æппæт мадзæлттæй. Фадат сын ис фидæны азæн горæты рæзты программæ сфидар кæныны хъуыддаджы архайынæн. Цæгат Ирыстоны экономикон рæзты министр Томайты Хъазыбег куыд бафиппайдта, афтæмæй пандемияйы рæстæг республикæйы бизнес-æхсæнад æххæст кодта ахсджиаг социалон функцитæ. Кæд æнцон рæстæг нæ уыд, уæддæр раиртæстой уый, æмæ нæм хъуамæ кæй фæзыной егъау куыстуæттæ. Уыимæ паддзахады æххуысмæ чи не нхъæлмæ кæсы, фæлæ ерысхъом чи уыдзæн, ахæмтæ.