Аразынц æй национ проект «Цардæн инфраструктурæ»-мæ гæсгæ
Ацы азы æппæтæй стырдæр фæндаггон арæзтадтæй иу дарддæр активонæй æххæстгонд цæуы. Архонкæйы иувæрсты цæуæн фæндаг цæттæ у 60 процентæн. Аразынц æй национ проект «Цардæн инфраструктурæ»-мæ гæсгæ. Кусынц дзы æрмæст фæндаггон специалисттæ нæ, фæлæ археологтæ дæр. Уæлдай цымыдисаг у станицæйы кæрон ингæны обау. Бæлвырддæр радзурдзæн Хъайтмазты Дзерассæ.
3 къуырийы археологон куыстытæ æмæ фыццаг хатдзæгтæ – ингæнты алыварс æмæ сæ сæрмæ дуртæй равæрдтытæ. Обауы цас сты, уый зын зæгъæн у. Археологты нысан у фыццагмæ бахæццæ уæвын. Æмæ кæд боныхъæды уавæртæ специалистты къуылымпы кæнынц, уæддæр хатдзæгтæ ис. Æппæт артефакттæ раиртасдзысты, уый фæстæ сæ ратдзысты республикæйы музейты фондтæм.
Обауы бæрзæнд у 3 метры бæрц, диаметр та – 40 метры онг. Зындгонд у ивгъуыд æнусы 70-æм азтæй æмæ у культурон намысы объект. Лæмбынæг раиртасын æй бахъуыд иуварс цæуæн фæндаджы арæзтады тыххæй.
Фидæны фæндаджы инфраструктурæ ахæм у нырма схемæйыл, фæлæ йæ 2025-æм азæй специалисттæ къæпхæнгай царды уадзынц. Æххæстгонд уыд стыр цæттæгæнæн куыст. Æппæтæй зындæр уаццаг у ныры трассæ. Бирæ уынгтæ йыл баст сты. Аразджыты бахъуыд бирæ коммуникацитæ ахæссын. Уыдон сты газы, доны хæтæлтæ, бастдзинады телтæ, электрон тыхдæттæг линиты цæджындзтæ. Специалисттæ ныртæккæ аразынц хидтæ. Уыдзысты 2, алкæцыдæр 72 метрæй фылдæр.
Абонмæ объект цæттæ у 60 процентæн. Специалисттæ бавнæлдтой фæндаджы фыццаг километртыл асфальт æвæрынмæ. Куыддæр ам куыстытæ фæуой, афтæ ацы хайыл транспорт ауаддзысты, сыхаг уаццагыл та райдайдзæн цалцæг. Æдæппæтæй трассæйыл фæнд кæнынц 80 тоннæйы бæрц асфальт сæвæрын. 2 азмæ специалистты хъæуы саразын дыккаг техникон категорийы фæндаг змæлды 4 рæнхъимæ. Сæ уæрх уыдзæн – фæйнæ 3 æмæ рдæг метры. Æдасдзинады нысанимæ сæ адих кæндзысты бырутæй. Объекты иумæйаг дæргъ уыдзæн 16 æмæ рдæг километрæй фылдæр.
Ног иуварсдзæуæн суыдзæн сæйраг регионалон фæндаг «Дзæуджыхъæу-Æрыдон-Цыкола-Лескен 2»-йы хай æмæ раивдзæн фæстаг дыууæрæнхъон уаццаг. Ацы трассæ уыдзæн æдасдæр æмæ æнцонвадатдæр. Объект аразынц нацпроект «Цардæн инфраструктурæ»-мæ гæсгæ. Специалистты ныхæстæм гæсгæ, куыстытæ цæуынц нысангонд фæткмæ гæсгæ æмæ фæуыдзысты 2028-æм азы.
