Иу къахыл æрбады æмæ сысты 117 хатты
Нæ дарддæры сюжеты хъайтар у æвзонг спортсмен Артур Айрапетян. Цæуы йыл æрмæстдæр 10 азы, æмæ ныридæгæн сси Уæрæсейы рекордтæ æвæрæг. Иу къахыл æрбады æмæ сысты 117 хатты. Ахæм æнтыстдзинад йæ къухы бафтыд ахадгæ тренирвкæты æмæ йæ тренер Алик Бучукурийы фæрцы. Æвзонг рекордсмены тыххæй бæстондæр радзурдзæн Чехойты Фатимæ.
Æрмæст ууыл йæ хъарутæ нæ фесты. Æрыгон спортсмен Артур Айрапетян цæуы тхеквондойы секцимæ. Йæ курдиат ын раиртæста йæ тренер Алик Бучукури. Лæппу йæ иу къахыл æрбадти 117 хатты. Уый тыххæй йæ ном хаст æрцыд Уæрæсейы рекордты чиныгмæ. Рагæй цæттæ кодта йæхи ацы æнтыстдзинадмæ. Сæйраг тренировкæты фæстæ-иу Артур иннæ лæппуты хуызæн йæ хæдзармæ нæ тагъд кодта. Уæлæмхасæн растæг дæр-иу баззади залы. Йæхиуыл æнæвгъауæй куыста.
Ацы æнтыстдзинад у тренер Алик Бучукури æмæ фидæны рекордсмены иумæйаг æмзонд куысты хатдзæг. Хъомылгæнæг куыд æмбæлы, афтæ бацæттæ кодта спортсмены. Æххæстæй йын раргом кодта йæ курдиат, æмæ Артурæн бантыст ахæм бæрзонд къæпхæнмæ схизын. Æдæппæтæй, Алик Бучукурийы разамындæй, Уæрæсейы рекордты чиныгмæ хаст æрцыд 8 æрыгон спортсмены номы. Къамисæн хъæугæ æрмæг æмбырд кодтой сæхæдæг. Хыгъд цыдысты лæппутæн сæ хуыздæр æнтыстытæ.
Кадимæ сæмбæлдысты рекордсменыл иннæ спортсментæ. Тхеквондойы олимпаг резервы спортивон скъолайы разамонæг Плиты Хетæг куыд бæхахх кодта, уымæ гæсгæ Артурæн ацы æнтыстдзинад йæ къухы бафтыд йæ куыстуарзондзинады фæрцы. Раарфæ кодта рекордсменæн æмæ йын балæвар кодта хæрзиуæг.
Артур Айрапетян дарддæр æнтыстджынæй архайы тхеквондойы секцийы. Йæхи цæттæ кæны ног фæлварæнтæм. Йæ зонындзинæдтæ æмæ йын йæ æнæкæрон тырнындзинад спортивон бæрзæндтæм фидæны хорз æххуыс фæуыдзысты олимпаг чемпион суæвынæн.
