Архайдтой дзы ворлдскиллсы алыхуызы департаментты, бизнесы организациты, наукæйы æмæ ахуырады минæвæрттæ
Арыдоны аграрон-технологон колледжы уыд «Ворлдскиллсы» программæтæ æмæ проектты сесси. Архайдтой дзы ворлдскиллсы алыхуызы департаментты, бизнесы организациты, наукæйы æмæ ахуырады минæвæрттæ. Уымæй уæлдай ма дзы равзаврдзысты сæйраг къæпхæны архайджытæ. Мадзалы уыд не сфæлдыстадон къорд.
Петр Ильин æрдз хъахъхъæныны куыст скодта йæ царды сæйрагдæр куыстыл. Равзæрста хъæдæй пайдæкæныны инженеры дæсныйад. Æрыгон адæймаг хъуамæ зона кусын документтимæ, хъæды зынгсирвæзты рæстæг раст архайын, бæлæстæ æнæзакъонæй калынæй бахъахъхъæнын æмæ ма æндæр ахсджиаг хъуыддæгтæ. Лæппу æвзарæн къæпхæнмæ æрбацыд Якутийæ.
Петр Ильинæй уæлдай ма, конкурсы æвзарæн къæпхæны архайынц Ярославлы, Кæсæг-Балхъары, Волгогорады областы æмæ Дагестаны минæвæрттæ. Ворлдскиллсы дисциплина – хъæдæй пайда кæныны инженери чемпионаты у ног. Фæсивæд хъуамæ сæ арæхстдзинад равдисой хъæды зынгсирвæзт ахуыссын кæныны хъуыддаджы. Дæсныйад баст у нырыккон технологитимæ. Хъæдгæсæн йæ куысты æххуыс у æнæпилотон хæдтæхæг. Экспертты нæхæстæм гæсгæ, конкурсанттæ иттæг хорз арæхсынц алцæмæ дæр.
Бæрзонд технологон цæстæнгас хъæууон хæдзарадон культурæтæ рæзын кæныны хъуыддагмæ у æнтысджын бизнесы гæнæн, зæгъынц эксперттæ æмæ «ситифермерство» – йы къабазы архайджытæ. Конкурсантты сæйраг хæс у чысыл фермæ бакæнын. Æппæт системæтæ дæр хъуамæ кусой автоматикон æгъдауæй.
Ацы къабазы дæснытæн стыр аргъ ис. Экспертты хсæн сты амалхъом адæм, ахуыргæнджытæ, стæй æппæт Бæстæйæ куыстдæтджытæ. Ситифермерствойы фæрцы ис саразын егъау зайæгойтæ парахатгæнæн куыстуат. Йæ руаджы, алцыдæр хорз кæм зайы ахæм зæхх нæ фаг кæныны фарста, лыггонд цæудзæн. Æмæ уый фидæны хъуыддаг нæу, фæлæ абоны.
Нырыккон базарадæн актуалон программæтæ бацæттæ кæнын, стæй студентты цæттæдзинад куыстмæ, систы конкурсы æвзарæн къæпхæны сæйраг темæтæ. Ворлдскиллсы агентады æххуысæй ис равзарын, регионы райрæзты хуыздæр стратегитæ. Фæсивæд канд чемпионаты фæлгæты нæ архайынц, фæлæ ма куыстуæтты дæр. Уымæ гæсгæ агентад æмæ республикæйы ахуырады министрад фæнд кæнынц Ворлдскиллсы гæнæтæй спайда кæнын астæуккаг ахуыргæнæндæдты рауагъдонты хатдзæгтæ кæнæн фæлварæнты рæстæг.
Специалистты ныхæстæм гæсгæ, ацы мадзал фæсивæдæн дæтты сæ дæсныйадыл æууæндындзинад. Уымæй уæлдай, сын фылдæр гæнæнтæ уыдзæн нырыккон гæнæнтæй архайынæн.
