Сног кæндзысты фæндæгты уæлцъар, сæвæрдзысты бандæттæ, бырондæттæ æмæ рухсытæ
Ацы аз Дзæуджыхъæуы базилдзысты 65 бирæуæладзыгон хæдзары кæртытæм. Сног кæндзысты фæндæгты уæлцъар, сæвæрдзысты бандæттæ, бырондæттæ æмæ рухсытæ. Куыстытæ æххæстгонд æрцæудзысты профилон федералон программæ гæсгæ. Бæлвырддæр хабæрттæ радзурдзæн Хъайтмазты Дзерассæ.
Весеннийы уынджы бирæуæладзыгон хæдзары цæрджытæ хъаст кæнынц, сæ кæртыуылты æдзухдæр цæуы бирæ машинæтæ. Уый тыххæй фæндаджы уæлцъар уайтагъд фехæлы. Архайдтой йæм сæхи тыхтæй базилыныл. Дзыхъхъытæ хуырæй байдзаг кодтой, фæлæ ахæм цалцæг бирæ нæ ахæссы, стæй хæрзхъæд нæу.
Тагъд фарста лыггонд æрцæудзæн. Бындурон цалцæг райдыдта. Дзæуджыхъæуы администрацийы специалисттæ радзырдтой, канд фæндаджы уæлцъар не сног кæндзысты. Хъæуы ма кæрты пълан дæр аивын. Æрмæст афтæмæй ис къæвдадондзæуæнты фарста алыг кæнын. Профилон программæмæ гæсгæ ма куыстытæ райдыдтой Международныйы уынджы дæр.
Владикавказскийы уынджы цæрджытæ та кусджытимæ иузæрдион уыдысты. Сæ бон цæмæй у, уымæй сын æххуыс кæнынц.
Æдæппæтæй аив кæныны программæмæ гæсгæ Дзæуджыхъæуы базилдзысты 65 кæртмæ. Сног кæндзысты фæндæгты уæлцъар, сæвæрдзысты бандæттæ, урнæтæ æмæ рухсытæ. Æппæт куыстытæ сæххæст кæндзысты афæдзы кæронмæ.
