Хойрагæй сæххæст кæндзысты 56 мин ахуырдзауы онг
Ацы аз скъоладзауты тæвд хæринагæй æххæст кæнынæн федералон æмæ республикон бюджеттæй радих кодтой 650 милуан сомæй фылдæр. Уый тыххæй фехъусын кодта Цæгат Ирыстоны ахуырады æмæ наукæйы министр Алыбекты Эллæ. Хойрагæй сæххæст кæндзысты 56 мин ахуырдзауы онг. Йе нæниздзинад хъыгдард кæмæн у, уыцы скъоладзаутæ та хæринаг исдзысты 2 хатты. Бæлвырддæр радзурдзæн Хъайтмазты Дзерассæ.
Къæдорæй конд хæринæгтæ, дыргътæ, чъиритæ. Скъоладзауты аходæнтæ сты алыхуызон. Рацион арæзтой, цæмæй хойрæгтæ хæрзад æмæ пайдайаг уой, афтæ. Сæйраг аргъгæнджытæ, æнæмæнг, сывæллæттæ сты. Меню хæринаггæнджытæй æвзæрдæр нæ зонынц. Козырты Хасан уарзы гречкæ тефтелитимæ.
Хасан æмæ Дзгойты Валерия ахуыр кæнынц 3-æм къласы. Иухуызон уарзынц картофджын. Куыд зæгъынц, афтæмæй æппæтæй зындæр вæййы 2-аг дзæнгæрæгмæ банхъæлмæ кæсын. Дзæуджыхъæуы 43-æм скъолайы сывæллæтты æххæст кæнынц тæвд хæринагæй. Хæринæгты иу хай æрбаласынц хойраджы комбинатæй, иннæтæ – цæттæ кæнынц хæрæндоны.
Цæлгæнæн кусы куыд иумæйаг механизм, афтæ. Куыддæр сывæллæтты фыццаг къорд аходæн райсы, афтæ кусджытæ афынг кæнынц иннæ скъоладзаутæн. Цæмæй 450 ахуырдзауы бафсадой, уый тыххæй хæрæндон кусын райдайы райсомы 6 сахатæй. Фыццаг 3 урочы хсæн баулæфæнты рæстæг аходынмæ æрбацæуынц райдиан кълæстæ. Сихортæй та æххæст кæнынц фæкæсынхъуаг бинонтæй сывæллæтты.
Фриттатæ, минестроне, болоньезе. Скъолайы хæрæндоны менюмæ бахæлæг кæндзысты æцæг гурмантæ æмæ италиаг хæринæгтæ чи уарзы, уыдон. Скъоладзаутæ ацы хойрæгтæн æмбæлгæ аргъ скодтой. Беконимæ хъайлайы, халсартæй хъæрмхуыппы æмæ пастæйы ад сын хорз зонгæ у. Ацы ахуыры азæй меню фæпарахатдæр. Цæттæ кæнынц хойраджы комбинаты. Ис дзы 2 цехы. Кондитероны цæттæ кæнынц десерттæ, кулинароны та – сæйраг хæринæгтæ. Алы райсом хойрæгтæ баласынц ахуыргæнæндæттæм. Куыстуаты специалисттæ ма цæттæ кæнынц хъæрмхуыппы æмбырдтæ.
Скъолайы хæрæндонæй алкæмæндæр зонгæ тæфæй комдæттæ æруайынц хистæртæн дæр, æмæ сывæллæттæн дæр. Комбинаты кондитертæ сабитæн уарзон адджинæгтæ цæттæ кæнынц сæ удыхъарм сæ бауадзгæйæ.
Хойрæгты хуызтæ фæпарахатдæр кодтой, 10 боны менюйæ 20 бонмæ кæй рахызтысты, уый фæрцы. Ацы азæй та ма комбинат цæттæ хæринаг æмæ æрдæгфабрикаттæ хæццæ кæны республикæйы интернаттæм æмæ техникумтæм.
