Уыди Цæгат Кавказы кинематографы бындурæвæрджытæй иу
Ацы бонты йæ 80 азы юбилей хъуамæ бæрæг кодтаид зындгонд режиссер Рафаэль Гаспарянц. Дæсны сфæлдыстадон кусæг. Уыди Цæгат Кавказы кинематографы бындурæвæрджытæй иу. Систа 70 документалон кинонывæй фылдæр. Рафаэль Гаспарянцы кинотæ уарзон систы цалдæр фæлтæры минæвæрттæн. «Песни над облаками», «Легенда горы Тбау», «По следам Карабаира», «Обида старого охотника» æмæ бирæ æндæртæ. Зыдтой æмæ йæ уарзтой æрмæст нæхи республикæйы нæ, фæлæ сыхæгтæ дæр. Кинотæ исынмæ иу æй æрбахуыдтой Дагестанмæ, Кæсæг-Балхъармæ æмæ Цæгат Кавказы иннæ республикæтæм. Сыгъдæгзæрдæ, цæстуарзон, фæлмæн адæймаг…
Баззад иу йæ куыстыты æмæ йæ хъайтарты аууон, йæ уæлахизты æмæ йæ хæрзиуджыты тыххæй дзурын нæ уарзта. Уый та ууыл дзурæг у, æмæ аивад уарзта æппæтæй фылдæр. Йæ очерктæ Расул Гамзатовы, Иосиф Бродскийы, Гæздæнты Гайтойы, Мурад Кажлаевы тыххæй систы цæгатирыстойнаг документалистикæйы хæзнатæ. Зæрдиагæй æххуыс кодта фæсивæдæн, иттæг хорз зыдта Къостайы поэзи æмæ йын кодта æгæрон аргъ. Къостайыл ист хуыздæр кинотæй иу – документалон лентæ «Коста Хетагуров. Завещание»-йы тыххæй Рафаэль Гаспарянц сси Хетæгкаты Къостайы номыл паддзахадон премийы аккаг.
Йæ кинонывты фылдæр дзуры йæ уарзон Дзæуджыхъæуыл. Йе стырдæр бæллиц та уыди Цæгат-Кавказы кинохроникæ сног кæнын. ПТРК- «Алани»-йы фæкуыста 53 азы. Йæ алыварс адæмæн уыди ныфсдæттæг хæлар æмæ цæстуарзон хистæр.
