Чи фæрынчын, уыдонæн се 70% сты 14 азы онг сывæллæттæ
Уæллаг Ларсы уавæрмæ цæуы бæстон цæстдард. Ууыл ныхас цыд республикæйы аппаратон æмбырды дæр. Куыд загътой, афтæмæй Цæгат Ирыстоны территорийы Арвы комы фæндагыл сæ радмæ æнхъæлмæ кæсынц мин машинæйæ фылдæр. Сæ фылдæр у уæзласæн транспорт. Дзанайты Барис профилон ведомствотæн бабар кодта, цæмæй уавæрмæ кæсой иттæг бæрнон цæстæй. Уымæй дарддæр æмбырды ныхас цыд æндæр ахсджиаг фарстатыл. Зæгъæм, ацы сезоны фыццаг хатт æхснырсæгæй рынчынты нымæц, къуырийы бæрæггæнæнтæм гæсгæ, фæфылдæр сты. Уый тыххæй фехъусын кодта Уæрæсейы фæлхасадмæ цæстдарды республикон упарвленийы разамонæг Тыбылты Алан. Ведомствойы бæрæггæнæнтæм гæсгæ, чи фæрынчын, уыдонæн се 70% сты 14 азы онг сывæллæттæ. Æнæниздзинадхъахъхъæнынады министр Тебиаты Сослан куыд радзырдта, афтæмæй республикæйы стационарты ОРВИ-йы диагнозимæ ныртæккæ ис 50 сывæллоны, æмæ 14 та хистæр кары пациенттæ.
