Цæгат Ирыстоны паддзахадон фæдзæхст бынат у республикæйы æрдзон хъæздыгдзинæдты сæйрагдæр бынæттæй иу
Бæстæйы сбæрæг кодтой фæдзæхст бынæтты æмæ национ паркты бон. Уæрæсейы уыдон æрмæст хъахъхъæнинаг територитæ не сты, фæлæ ма наукон куыстуæттæ дæр. Сæ фæрцы адæймагæн йæ бон у нæ алыварс дуне хуыздæр базонын æмæ хъахъхъæнын. Фæдзæхст бынæтты æмæ паркты кусджытæ архайынц цæрæгойты æмæ зайæгойты генетикон фондтæ бахъахъхъæныныл. Цæгат Ирыстоны паддзахадон фæдзæхст бынат у республикæйы æрдзон хъæздыгдзинæдты сæйрагдæр бынæттæй иу. Йæ специалисттæ хъахъхъæнынц, æмбал кæмæн нæй, ахæм флорæ æмæ фаунæйы хуызтæ. Фæдзæхст бынаты ис цæрæгойты 58 хуызы. Уыдонæй 7 хаст сты Сырх чиныгмæ. Æппæты стырдæртæ дзы сты зубртæ. Фæлæ ацы бынæтты сæйрагдæр цæрæгойтæ сты дзæбидыртæ. Ам дзы ис минæй фылдæр. Уымæй уæлдай, хъæддаг гæдытæ, саджы хуызтæ, леопардтæ. Мæргътæ – 207 хуызы, 24 дзы хаст сты Сырх Чиныгмæ. Хъæздыг дзы у флорæ дæр. Зайæгойты мин æмæ 5 сæдæ хуызæй фылдæр. Фæдзæхст бынаты æппæт дæтты ис балер кæсаг. Туристты æнцойдзинадæн дзы скодтой сæрмагонд экологон фæндæгтæ.
