Комплексы сæйраг монумент «Хъыджы бæлас» систой реставраци кæнынмæ, йæ бындур ын фæфидардæр кодтой æмæ сæвæрдтой уырдыг быцæу
Беслæны мемориалон уæлмæрд «Зæдты горæт» дарддæр аив кæнынц. Комплексы сæйраг монумент «Хъыджы бæлас» систой реставраци кæнынмæ, йæ бындур ын фæфидардæр кодтой æмæ сæвæрдтой уырдыг быцæу. Куыстытæ цæуынц уæлмæрды территорийы дæр. Специалисттæ сног кодтой уæлцъар, базылдысты уæлингæн къæйдуртæм, ивынц доны хыз. Бæлвырддæр радзурдзæн Хъайтмазты Дзерассæ.
Мемориалон комплекс «Зæдты горæт»-ы специалисттæ лæмбынæг кусынц. Реставраци кæнынц сæйрагдæр номарæн символ – скульптурæ «Хъыджы бæлас». Монумент фехæлынæй бахъахъхъæнын æппæтæй зындæр разынд. Специалистты хъуыдымæ гæсгæ, технологон æгъдауæй раст конд нæу. Скульптурæ къæпхæнгай райхæлдтой. Алы ярус дæр бетонæй дзаг уыд. Хъуыдис æй къухæй ссыгъдæг кæнын.
æмæ кæд æппæтæй зындæр куыст æххæстгонд у, уæд сæйраг бæрнон хъуыддаг та нырма разæй ис. «Хъыджы бæлас» райдыдтой æмбырд кæнын. Ныридæгæн сæвæрдтой æфсæн каркасы сæйраг цæджындз. Скодтой гранитон къæйдуртæ æмæ бындур.
Мемориалон комплекс «Зæдты горæт»-ы куыстытæ уыцы иу рæстæг æххæст кæнынц 2 подрядон организацийы. Цалынмæ иутæ скульптурæмæ зилынц, уæдмæ иннæтæ аив кæнынц территори. Куыст чысыл нæй, зæгъынц специалисттæ. Парковкæйы æххæстæй баивтой асфальт. Уæлмæрды территорийы сæвæрдтой гранитон поребрик, кæм хъуыд, уым сног кодтой уæлингæн къæйдуртæ. Райдыдтой æвæрын донпырхгæнæн автоматикон системæ, ивынц доны хыз.
Фæрæзты иумæйаг бæрц у 110 милуан сомы онг. Ацы хъуыддаг æххæстгонд цæуы паддзахадон программæ «Цæгат Кавказы федералон зылды райрæзт»-мæ гæсгæ. æппæт куыстыты фæдыл ныхасгонд уыд «Беслæны мадæлты» комитетимæ.
