Специалисттæ райхæлдтой бæласы æддаг уæлцъар, цæмæй цыртдзæвæны уавæр феной, уый тыххæй
Беслæны Зæдты горæты райдыдтой «Хъыджы бæлас»-ы рацарæзты куыстытæ. Специалисттæ райхæлдтой бæласы æддаг уæлцъар, цæмæй цыртдзæвæны уавæр феной, уый тыххæй. Куыстытæ цæуынц, паддзахадон программæ «Цæгат Кавказы федералон зылды рæзт» æххæст кæнгæйæ. Проект аразгæйæ хыгъд цыдысты «Беслæны мадæлты» комитеты уæнгты хъуыдытæ. Уыцы-иу рæстæг аивгонд цæуы алфамбылай территори дæр. Бæлвырддæр радзурдзæн Хъайтмазты Дзерассæ.
«Хыджы бæласы» бронзæ кронæ специалисттæ исынц къæпхæнгай, сантиметргай. Мемориалон комплекс «Зæдты горæт»-ы райдыдта Беслæны трагедийы амæттæгты мысыны сæйрагдæр символтæй иуы реставраци. Цыртдзæвæны уæллаг хай систой бæлвырд æй раиртасыны тыххæй. Иннæ къæпхæн уыдзæн монументы бындур æмæ быннаг хай райхалын. Æппæт куыстытæ æххæстгонд цæуынц лæмбынæг, цæмæй бæласы алы хай дæр хъахъхъæд æрцæуа.
Уыцы иу рæстæг цæуынц мемориалы территори аив кæныны комплексон куыстытæ. Ам ног кæнынц газон, зилынц уæлингæн плитатæм, æвæрынц ног брусчаткæ æмæ гранитон поребрик. Ныридæгæн фесты парковкæйы фæзы асфальт æвæрын.
Ныртæккæ специалисттæ æвæрынц бындур ног фæндæгтæн. Комплексы территорийы сæвæрдзысты уæлæмхасæн нуазæн чысыл фонтантæ дæр. Проектмæ гæсгæ хъуамæ сног кæной донæххæстгæнæн системæ, донпырхгæнæн автоматикон системæ та ам фæзындзæн фыццаг хатт.
«Зæдты горæт» у, теракты чи фæмард, уыдоны нæмттæ æрхъуыды кæнынмæ, æрвылаз æппæт бæстæйæ мингай адæм кæдæм æрбацæуынц, ахæм бынат. Абон реставраторты сæйраг хæс у мемориалон комплекс фидæны фæлтæртæн бахъахъхъæнын, йæ историон хуыз æнæаивгæйæ. Куыстытæ æххæстгонд цæуынц федералон программæ «Цæгат Кавказы федералон зылды райрæзт»-ы фæрцы. Проектыл бакуыстой æхсæнадон организаци «Беслæны мадæлты» хъуыдытæ хынцгæйæ.
