Æрныхас кодтой экологон туризмы рæзты æмæ историон-культурон, стæй фæдзæхст бынаты æрдзон хæзнатæ хъахъхъæныны фарстатыл
Республикæйы сæргълæууæг Битарты Вячеславæн кусæг фембæлд уыди Цæгат Ирыстоны паддзахадон фæдзæхст бынаты разамонæг Дзалаты Олегимæ. Æрныхас кодтой экологон туризмы рæзты æмæ историон-культурон, стæй фæдзæхст бынаты æрдзон хæзнатæ хъахъхъæныны фарстатыл. Цæгат Ирыстоны фæдзæхст бынат республикæйы нымад у уникалон бынатыл, хонынц æй ирон адæмы национ хæзна дæр. Фæдзæхст бынат ахсджиаг бынат ахсы, стæм чи у, ахæм цæрæгойты хизæнуæтты дæр. Нæ сæйраг хæс у ацы æрдзон лæвар фидæны фæлтæртæн бахъахъхъæнын, загъта Битарты Вячеслав. Дзалаты Олег республикæйы сæргълæууæгæн бæстонæй радзырдта фæдзæхст бынаты архайды тыххæй. Уымæй уæлдай, æрныхас кодтой регионы туризмы гæнæнтыл. Æрæджы бакуыстой адæмы хсæн уарзон чи сты, ахæм алы æмвæзадыл туристон маршруттыл. Фæдæзхст бынатмæ чи æрбацæуы, уыдонæн раттынц сæрмагонд æвдисæндартæ. Дарддæр куыст цæуы уæлæмхасæн экологон къахвæндæгтыл, æмæ афæлгæсæн кæцæй уыдзæни, ахæм фæзыл. Фембæлды кæронбæттæны Битарты Вячеслав зæрдæ бавæрдта, ахадгæ æмгуыстадæй.
