Стыр æргом дзы аздæхтой нæ регионы эпидемиологон уавæрмæ
Цæгат Ирыстоны сæргълæууæг Битарты Вячеславы разамындæй арæзт æрцыд Оперативон штабы радон æмбырд. Стыр æргом дзы аздæхтой нæ регионы эпидемиологон уавæрмæ. Ахсджиаг фарстатыл ныхас кодтой хицауады уæнгтæ, бæрнон структурæты разамонджытæ, стæй медицинон куыстуæтты сæйраг дохтыртæ. Æмбырды архайджытæ æрдзырдтой, коронавирусы инфекци парахат кæнын не руадзыны мадзæлттыл. Уымæй дарддæр анализ скодтой медицинон объектты архайдæн, стæй республикæйы санитарон-эпидемиологон уавæрæн. Хицауады сæрдары хæдивæг – æнæниздзинадхъахъхъæнынады министр Годжысаты Тамерлан йæ раныхасы куыд загъта, афтæмæй тæссаг у ацы низы дыккаг уылæнæй. Уымæн æмæ республикæйы цæрджытæ атындзыдтой Уæрæсейы курорттæм, æмæ ахсджиаг у хи бахъахъхъæнын. Хаст æрцыд уынаффæ, тагъд æххуысы республикон клиникон рынчындон йæ раздæры фæткмæ разадхын, ома ковид-пациенттимæ куыст сног кæнын. Битарты Вячеслав профилон министрæн бабар кодта, республикæйы æнæниздзинадхъахъхъæнынады куыстуæттæн æмбæлгæ фæндаггон картæйыл бацархайын. Уыимæ хынцын пациентты æмæ медицинон кусджыты уавæртæ. Æнæмæнг хъæуы дарддæр санитарон-эпидемиологон домæнтæ æххæст кæнын, цæмæй коронавирусы инфекци парахат ма кæна, уый тыххæй, – загъта республикæйы разамонæг.
