Ахуыргæнæндæттæ ифтонг сты тæккæ нырыккондæр техникæйæ æмæ кусæнгæрзтæй
Бындурон цалцæджы фæстæ скъолатæ байгом кодтой Змейкæйы æмæ Хæзныдоны. Ахуыргæнæндæттæ ифтонг сты тæккæ нырыккондæр техникæйæ æмæ кусæнгæрзтæй. Се ппæт дæр ацы бæрæгбонмæ зæрдиагæй æнхъæлмæ кастысты. Уæлдайдæр та сывæллæттæ. Скъолатæ бабæрæг кодта не сфæлдыстадон къорд. Æмæ бæлвырддæр хабæрттæ радзурдзæн Сосранты Жаннæ.
Ног ахуыры аз кæд дыууæ мæйы размæ райдыдта, уæддæр ма скъоладзаутæ ныр дæр исынц лæвæрттæ. Зæгъæм, Змейкæйы станицæйы дыккæгæм скъола ногæй сбæрæг кодта зонындзинæдты бон. Уыимæ традицион ирон кæрдзынтимæ, кафт æмæ зардимæ. шшщщАцы бæрæгбонмæ се ппæт дæр зæрдиагæй æнхъæлмæ кастысты. Уæлдайдæр та сывæллæттæ. Цалынмæ се скъолайы бындурон цалцæг цыди, уæдмæ ахуыр кæнынмæ цыдысты сыхаг хъæумæ. Ахуыр кодтой дыууæ радæй. Фæлæ куыд фæзæгъынц, уазæгуаты хорз у, фæлæ хи хæдзары та уымæй хуыздæр. Уæлдайдæр ног цалцæггонд куы уа, уæд.
Къултæ ахуырст, нырыккон кусæнгæрзтæ, хъармгæнæн системæ. Баивтой, зæгъæн ис, æмæ алцыдæр. Æмæ ма сæм фæзынд хæрæндон дæр. Раздæр сывæллæттæ сихоры хæрд кодтой актон залы. Скъолайæн бындур æвæрд æрцыд 1959-æм азы. Уæдæй фæстæмæ бæстон цалцæггонд нæ уыд.
Бындурон цалцæджы фæстæ байгом Хæзныдоны скъола дæр. Ам кæддæриддæр сæ зæрдыл дарынц сæ истори. Историйыл дзурæг та сты бынæттон музейы экспонаттæ. Алы экспонат дæр у хицæн ныхасы аккаг. Скъолайæн бындур чи æвæрдта, уыдон Хæзныдон хъахъхъæдтой Фыдыбæстæйы Стыр хæсты. Уыцы-иу рæстæг архайдтой ууыл, цæмæй хъæу цæра æмæ рæза. Ныртæккæ сæрыстыр сты бирæ хъуыддæгтæй. Точка роста, нымæцон ахуырадон центр, курчатовы кълæстæ. Ногдзинæдтæ бирæ. Фæлæ сæйрагдæр – æмбæлгæ уавæртæ æмæ æдасдзинады мадзæлттæ æххæстгонд кæй æрцыдысты, уый.
Бындурон цалцæджы рæстæг цы зындзинæдтæ æййæфтой, уыдон скъоладзаутæй æмæ ахуыргæнджытæй ныр рохуаты баззайдзысты. Фарстатæ лыггонд æрцыдысты. Разæй та сæм æнхъæлмæ кæсы ахуырмæ цымыдисаг фæндаг.
