Экспозицийы фенæн ис 70 куысты онг
«Мастер æмæ рæстæг. Æнусты мелоди». Уæрæсейы Адæмон нывгæнæг Челæхсаты Магрезы куыстыты равдыст байгом Цæгат Ирыстоны Национ музейы галерейы. Экспозицийы фенæн ис 70 куысты онг. Конд сты алы жанрты: нывкæнынад, портрет, натюрморт æмæ жанрты композицитæ. Мастер æмхуызонæй архайы модернизмы æмæ реализмы нывкæнынады скъолайы техникæты. Зындгонд театралон нывгæнæг, 120 спектакльмæ декорациты автор. Сæ фылдæр хаст æрцыдысты ирон сценикон культурæйы сызгъæрин фондмæ. Бирæ азты дæргъы ма Челæхсаты Магрез сфæлдыстадон куыстæй дарддæр кодта ахуыргæнæджы куыст дæр. Йæ ахуыргæнинæгтæ ныртæккæ систы хъуыстгонд нывгæнджытæ. Мастеры нывтæ сты Уæрæсейы, Европæйы, Америкæйы Иугонд Штатты æмæ Японийы егъау музейты, стæй хи коллекциты. Равдыст «Мастер æмæ рæстæг. Æнусты мелоди» кусдзæн 29-æм майы онг.
