Районы хъæууонхæдзарадон управленийы куыд зæгътой, афтæмæй ацы аз зæххыты фылдæр хайы тыд æрцыд нартхор, æмæ сæ зæрдæ дарынц хъæздыг тыллæгыл.
Дыгуры районы хадзарæдтæ сæ быдыртæм дарддæр кæсынц. Хæссынц сæм хъацæнтæ, кæнынц радон куыстытæ. Районы хъæууонхæдзарадон управленийы куыд зæгътой, афтæмæй ацы аз зæххыты фылдæр хайы тыд æрцыд нартхор, æмæ сæ зæрдæ дарынц хъæздыг тыллæгыл. Уымæй уæлдай ма фылдæр кæны хъомысджын хæдзарæдты нымæц. Дыгуры районы быдыртæ федта не сфæлдыстадон къорд.
Фермерон хæдзарад «Капитал Агро» Дыгуры районы раззагдæртæй иу у. Йæ куысты бæрæггæнæнтæ афæдзæй-афæдзмæ хуыздæр кæнынц, йæ авналæнтæ та уæрæхдæр æмæ бирæвæрсыгдæр. Хорз тыллæг æрзайын кæнын къухы иу бонмæ нæ бафты, фæлæ хъæуы æрвылбон зæххыл кусын, æмæ йæ уарзын, зæгъы хæдзарады æрыгон фермер Бердиты Мæирбег.
Кусын кæй фæнда, уый æфсонтæ нæ фæагуры, зæгъы Бердийы-фырт дæр. Йæ бæрны цы зæххытæ ис, уыдонмæ канд æнхъæлмæ нæ кæсы, фæлæ ма сын æххуыс кæны – фæсарæйнаг раззагдæр зæхкусджыты гæнæнтимæ зонгæ кæнгæйæ.
Фидæны фæндтæ къухы бафтдзысты æрмæстдæр иумæйаг куысты фæрцы, зæгъынц зæхкусджытæ. Дыгуры районы хъæууон хæдзарады кусджытæ сты иу бинонты хуызæн, кæрæдзийы фарсмæ æрбалæугæйæ иумæйагæй фæкæнынц сæ куыст. Районы хъæууон хæдзарады хайады разамонæг Бадриты Маринæйы ныхæстæм гæсгæ ныртæккæ сæ уавæртæ сты зæрдæмæдзæугæ.
Зæхкусджытæ ног технологитæй кæй пайда кæнынц, уый æнæмæнг сæ куыстыл æмæ тыллæджы хæрзхъæддзинадыл фæбæрæг. Æвæццæгæн хорз зæхкусæгмæ фидæнмæ дæр хъуамæ фæндтæ уа.
Дыгуры районы быдырты ацы фæззæг æнхъæлмæ кæсынц нартхор, картоф, соя, æмæ ма æндæр культурæты æрзадмæ.
Стенд: Зæрдæ райы Дыгуры районы быдырты уындæй, базыдтам, куыд ис æрзайын кæнæн бæркадджын тыллæг.
