Нæ республикæмæ ссыдысты 20 спорстмены нæ бæстæйы алы регионтæй. Сæ фæлтæрддзинадыл æфтауынц сæрмагонд полигоны
Дыккаг аз Цæгат Ирыстон архайы ахуырадон-тренировкæтæгæнæн æмбырды, Уæрæсейы чемпионаты агъоммæ практикон æхстытæй. Нæ республикæмæ ссыдысты 20 спорстмены нæ бæстæйы алы регионтæй. Сæ фæлтæрддзинадыл æфтауынц сæрмагонд полигоны. Чемпионат арæзт æрцæудзæн Уралы сæйраг горæт Екатеринбурджы, сентябры райдиан. Чехойты Фатимæ радзурдзæн бæлвырддæр.
Бæлвырд, тагъд, алы змæлд дæр арæхстджынæй. Павел Торгашов практикон æхстæй архайы 18 азы бæрц. Уыцы рæстæгмæ сси дунейы æмæ Европæйы чемпион, ныр та йæ фæлтæрддзинад *вдисы Уæрæсейы иугонд командæйæн ахуырадон-тренировкæтæгæнæн æмбырды. Спортсмен Мæскуыйæ Цæгат Ирыстонмæ фыццаг хатт не ссыд, куыд фæбæлвырд кодта, афтæмæй ам арæзт сты æппæт фадæттæ бæрзонд уæлвæзадыл цæттæ кæнынæн.
Фидæны Уæрæсейы чемпионаты республикæйы кад хъахъхъæндзæн Хъантемыраты Виктория. Ныр спортсменкæ кусы, ерысты программæмæ цы элементтæ хаст уыдзысты, уыдоныл. Йæ ныхæстæм гæсгæ, уæлдай ахсджиаг у тренировкæтæ кæнын иннæ регионты минæвæрттимæ — алкæмæ дæр сæ ис ерысты архайыны фæлтæрддзинад æмæ цæттæ кæныны хицæндзинæдтæ.
æдæппæтæй нæ республикæмæ бæстæйы алы регионтæй ссыдысты 20 спортсмены. æмбырд цæуы 17-æм августæй 23-æммæ. Къуырийы дæргъы спортсментæ кусынц сæ техникæйыл, æвзарынц ерысты хæслæвæрдтæ, архайынц элементтæ цыбыр рæстæгмæ æххæст кæныныл.
Уæрæсейы иугонд командæйы тренер Хъантемыраты Барисы ныхæстæм гæсгæ, ахæм æмбырд хорз фадат у спортсментæн æрмæст фидæны ерыстæм цæттæ кæнынæн нæ, фæлæ кæрæдзийы фæлтæрддзинадимæ зонгæ кæнынæн.
Уæрæсейы иугонд командæйы ахуырадон-тренировкæтæгæнæн æмбырд Цæгат Ирыстоны цæуы дыккаг аз фæд фæдыл. Йæ саразджыты фæнды, цæмæй республикæ фидæны дæр суазæг кæна бæстæйы хуыздæр спортсменты, æмæ сын ам уа фадæттæ ерыстæм цæттæ кæнынæн. Уæрæсейы чемпионат практикон æхстæй ацæудзæн сентябры райдиан Екатеринбурджы, Цæгат Ирыстоны кад дзы хъахъхъæндзысты 5 спортсмены.
