Нысангонд æрцыд бирæ мадзæлттæ: акцитæ, фембæлдтытæ, сфæлдыстадон равдыстытæ
Дзæуджыхъæуы 4-æм гимназы цæттæ кæнынц Уæлахизы бонмæ. Нысангонд æрцыд бирæ мадзæлттæ: акцитæ, фембæлдтытæ, сфæлдыстадон равдыстытæ. Ахуырдзаутæн æмæ педагогтæн бæрнон ахаст ис ацы хъуыддагмæ. Алы лыстæг хабарыл дæр бæстонæй кусынц. Сæ архайдæй сæ фæнды бузныг зæгъын, сабыр цард чи балæвар кодта, уыцы кадджын хистæрты фæлтæрæн. Бæлвырддæр радзурдзæн Хъайтмазты Дзерассæ.
Нырма бынтон æвзонг, фæлæ уыимæ бæрнон ахастимæ. Дзæуджыхъæуы 4-æм гимназы ахуырдзаутæ цæттæ кæнынц Уæлахизы бонмæ. Скъолайы спортивон залы кадеттæ рæнхъытæй цæуынц. Ам цæттæ кæнынц импровизацигонд парадмæ. Уыдзæн ахуыргæнæндоны бындурыл 8-æм майы. Архайдзысты фондз кадетон къласы ахуырдзаутæ. Сывæллæттæ рагагъоммæ цæттæ кæнынц, бæлвырд кæнынц хæстрæнхъон цыд, ахуыр кæнынц командæйы кусыныл. Архайджыты хсæн хистæркъласон Ангелина ТимакОва дæр. Куыд зæгъы, афтæмæй кадетон змæлд ын сси йæ царды ахсджиаг къадзæф, бæрæгбоны мадзæлтты архайд та – бæрнон хъуыддаг.
Уыцы иу рæстæг ма кадеттæ цæттæ кæнынц иу ахсджиаг цаумæ – республикон кадетон балмæ. Традицимæ гæсгæ вæййы 9-æм майы. Цыппæрæм гимназ дзы равдисдзæн 3 номеры: падегрАс, кадриль æмæ кадетон вальс. Репитицитæ цæуынц æрвылбон, алы азмæлдыл дæр лæмбынæг куыст цæуы.
Ам архайынц æппæтæй кæстæр ахуырдзаутæ дæр. Фыццагкъласонтæ цæттæ кæнынц салдаты зарæджы скъолайы фестиваль «На привале»-мæ. Архайдзысты дзы гимназы æппæт кълæстæ. Сценæйæ азæлдзысты хæстон зарджытæ æмæ фронты æфсæддонтæн ныфс цы уацмыстæ лæвæрдтой, уыдон.
Уæлахизы боны агъоммæ гимназы уыд Лæгдзинады урок дæр. Ахуырдзаутимæ сæмбæлд Фыдыбæстæйы Стыр хæсты ветеран Карсанаты Владимир. Радзырдта, хæст куы райдыдта, уæд ыл 9 азы кæй цыд, йæ ныййарджытимæ йæ куыд фæхицæн кодтой æмæ цы зындзинæдтæ бавзæрста, уый тыххæй. Скъоладзаутæ фехъуыстой концлагеры тыххæй мысинæгтæ, фашистты фыдракæндты æмæ уыцы азты адæмы царды алы минутæн дæр цы аргъ уыдис, уый тыххæй. Ацы ныхас рæзгæ фæлтæрæн хуымæтæг историйы урок не сси, фæлæ хæст чи ацыд, уыцы фæлтæры ныфсхастдзинады æвдисæн.
Ацы бонты гимназы цæудзысты викторинæтæ, фестивальтæ, архайдзысты интерактивон фæзтæ, арæзт цæуынц «Нымасы бæлæстæ» æмæ мыдадзын цырæгътимæ акцитæ хъæбатырты кадæн. Ахуыргæнæндоны алцыдæр сæрмагонд мидисæй æххæст у, къæлидорты зæлдзысты хæстон зарджытæ æмæ хæсты фæстаг бонты хроникæ.
Сæйраг мадзал суыдзæн скъолайы кадджын линейкæ. Кадеттæ рацæудзысты Уæлахизы тырысаимæ, се ппæт дæр минут æдзæмæй алæудзысты, сабыр царды сæрвæлтау йæ цард чи нæ бавгъау кодта, уыдоны номыл. Сывæллæттæн ма лæвæрд æрцæудзысты кадетты нысантæ.
