Уыцы сгуыхтдзинад скъоладзауты къухы бафтыд æнтыстджын тренировкæты фæрцы
Дзæуджыхъæуы 44-æм скъолайы командæ баскетболæй рамбылдта Цæгат Кавказы федералон зылды ерыстæ. Уыцы сгуыхтдзинад скъоладзауты къухы бафтыд æнтыстджын тренировкæты фæрцы. Баскетболисттæ сæхæдæг куыд зæгъынц, уымæ гæсгæ сын ерысты фæстæ фæлладуадзынæн рæстæг нæй — сæхи цæттæ кæнынц ног турниртæм. Бæлвырддæр хабæрттæ радзурдзæн Чехойты Фатимæ.
Сæ фæллад нæма ссыд, афтæмæй та — ног тренировкæтæ. Цæгат Ирыстоны командæ баскетболæй Цæгат Кавказы федералон зылды ерысты Дагестаны рамбылдта фыццаг бынат. Йæ капитан Суанты Станислав нымад æрцыд турниры хуыздæр хъазæгыл. Йæ ныхæстæм гæсгæ, йæхи хæрзиуæг ын командæйы уæлахизы хуызæн, ахсджиаг нæу. Спортæй архайы 6 азы. Уыцы рæстæгмæ сси стыр фæлтæрддзинады хицау. Станислав у Дзæуджыхъæуы 44-æм скъолайы 11-æм къласы ахуырдзау. У зæрдæргъæвд лæппу. Йе *нтыстджын ахуыры тыххæй хъуамæ суа сызгъæрин майданы аккаг. Скъолайы фæстæ фæнд кæны йæ цард спортимæ бабæттын.
Цæгат Кавказы федералон зылды ерыстæ ацыдысты февралы кæрон. Цæгатирыстойнаг баскетболисттæ финалы фембæлдысты Дагестаны командæимæ. Кæд хъазты цыппæрæм хайы нæ лæппутæ хæрд кодтой, уæддæр сын бантыст 66:46 хыгъдæй рамбулын. Дзæуджыхъæуккаг баскетболистты командæйы сæйраг тренер куыд фæнысан кодта, уымæ гæсгæ уыцы хатдзæг у иттæг хорз бæрæггæнæн.
Баскетболисттæ сæхи ерыстæм цæттæ кодтой цалдæр мæйы дæргъы. Тренировкæты рæстæг æвæллайгæйæ куыстой сæ техникæйыл, архайдтой се спортивон бæрæггæнæнтæ фæбæрзонддæр кæныныл. Сæ размæ сæвæрдтой хæс — Ирыстонмæ сызгъæрин майдантæ сласын. Сæйраг тренеры æххуысгæнæг Хекъилаты Зауырбеджы ныхæстæм гæсгæ, ныртæккæ баскетболисттæ æвдисынц хорз цæттæдзинад.
Ныртæккæ скъоладзаутæ сæхи цæттæ кæнынц ног ерыстæм. Апрелы кæрон архайдзысты Æппæтуæрæсеон турниры. Ацæудзæн Самарæйы.
