Спортивон скъолайы хъомылгæнинæгты ныййарджытæ сæм бацыдысты æххуысагур
Дзæуджыхъæуы æхсæнадон советы минæвæрттæ инспекцийы хуызы бабæрæг кодтой стадион «Юность». Спортивон скъолайы хъомылгæнинæгты ныййарджытæ сæм бацыдысты æххуысагур. Газонтæ дзуапп нал дæттынц нырыккон домæнтæн. Фæстаг хатт сæ сног кодтой 10 азы размæ. Уæвгæ та спорты æдасдзинадмæ стыр æргом здæхт цæуы. Бæлвырддæр хабæрттæ радзурдзæн Чехойты Фатимæ.
Хуымæтæг футболы фæз нæ, фæлæ цæлхдурты быдыр. Раст газоны бæсты – къуыбырты æмæ дзыхъхъытæ.
Спортивон скъолайы тренертæ азæй азмæ сæ цæст лæмбынæг дарынц æдасдзинады фарстатæм. Хъомылгæнджыты ныхæстæм гæсгæ, газон домæндæн дзуапп кæй нæдæтты, уый тыххæй бирæ сывæллæттæ фесты цæфтæ.
Скъолайы футболон фæзтæм базылдысты 10 азы размæ, афтæмæй газонты эксплуатацийы рæстæг у 5 азæй 8 азы онг. Лыггæнинаг фарстатæ феныны тыххæй, скъола бабæрæг кодтой æхсæнадон советы сæрдар Атайты Вячеслав æмæ йæ хæдивæг Мæрзойты Феликс.
æхсæнадон советы сæрдар Атайты Вячеслав куыд фæбæлвырд кодта, афтæмæй амæй размæ кусæг фембæлд арæзт æрцыд Республикæйы физкультурæ æмæ спорты министримæ. Фрайты Сосланы ныхæстæм гæсгæ, уавæрмæ цæстдард цæуы.
Ардæм цæуынц 1000 сывæллонмæ хæстæг. Сæ ныййарджыты фæнды, цæмæй спортивон скъола рæза, йæ уавæртæ дзуапп дæттой нырыккон домæнтæн.
Спортсменты куырдадзæн ис хъæздыг истори, кæцы ахсджиаг у фæлтæртæм хæццæ кæнын. Скъола бацæттæ кодта бирæ зындгонд футболистты. Уыдон сты – æгайты Алан, Пагæты Артур æмæ æндæртæ. Уыцы нæмтты хыгъд дарддæр дæр рæздзæн. Сæйрагдæр у, цæмæй æрыгон курдиатджын спортсментæн ам арæзт цæуой æмбæлгæ уавæртæ.
