Сæрмагондæй æнæххæстбарджын æхсæнад «Норильскникельремонт»-æн, уый та хауы компаниты къорд «Норникель»-мæ
Цæгат Кавказы хæххон металлургон институт бацæттæ кæндзæн хицæн программæ, æмæ уымæ гæсгæ ахуыр кæндзысты астæуккаг профессионалон ахуырады специалисттæ. Сæрмагондæй æнæххæстбарджын æхсæнад «Норильскникельремонт»-æн, уый та хауы компаниты къорд «Норникель»-мæ. Куыстуат цæттæ у бæлвырд ахуырадон заказ скæнынмæ æмæ йæ хæстæгдæр рæстæг бавдисынмæ. Уый фæдыл бадзырд сæ кусæг фембæлды сфидар кодтой, республикæйы Сæргълæууæг Сергей Меняйло æмæ æнæххæстбарджын æхсæнад «Норильскникельремонт»-ы генералон директор Виталий Довгаль. Регионы разамонæг куыд загъта, афтæмæй Цæгат Ирыстон æмæ Норильск рагæй бæттынц æнгом ахастдзинæдтæ. Уымæ гæсгæ республикæйы разамынд архайы уыцы бастдзинæдтæ фидардæр кæныныл. Фыццаджыдæр мах архайæм астæуккаг профессионалон ахуырады рæзтыл, сымах та хъæуынц фæлтæрдджын кадртæ. Уымæ гæсгæ нæ нысантæ сты иумæйаг. Уæ компанийæн специалистты цæттæ кæнгæйæ, нæ куыст фæегъаудæр уыдзæн, загъта нæ республикæйы Сæргълæууæг.
Виталий Довгаль та бафтыдта, Цæгат Ирыстон рагæй дæр кæй у нæ бæстæйы хæххон-металлургон къабазæн специалистты цæттæгæнæн æрмадз. Бæлвырддæр зæгъгæйæ та куыстуат «Норильскникельремонт»-ы ис 10 мин кусæджы. Уыдонæй 300 адæймаджы сты Цæгат Кавказы хæххон металлургон институты рауагъдонтæ. Уыимæ фæсивæд сты фæллойуарзаг, хæрзæгъдау æмæ дæсны цспециалисттæ. Уæвгæ та куыстуат æмгуыстад кæны 15 уæрæсейаг уæлдæр ахуыргæнæндонимæ. Фæлæ ахæм хорз бæрæггæнæнтæ дæттынц æрмæстдæр нæ республикæйы хæххон металлургон институт, загъта «Норильскникельремонт»-ы генералон директор.
Сергей Меняйло бахаста фæндон, компанийы бæлвырд ахуырадон заказ скæнын. Ома цавæр къабæзты цавæр специалисттæ хъæуы, уый фæдыл. Уый фæстæ хæххон металлургон институт бакусдзæн сæрмагонд программæтыл. Нысан кæнынц методикон амынддзинæдтыл бакусын дæр. Республикæйы ахуырады министр Алыбекты Эллæ куыд загъта, афтæмæй ахæм ахуырады рæстæг ахсджиаг у педагогты фæлтæрддзинад хынцын. Фидæны ма нысан кæнынц Цæгат Кавказы хæххон металлургон институты «Норникелы» кафедрæ байгом кæнын дæр.
