Уырдæм æрбамбырд сты Ирыстоны театрты артисттæ, æхсæнады минæвæрттæ, стæй Щукины номыл театралон институты рауагъдонтæ
Бирæ рæстæг нæ рацыд, Дзæуджыхъæуы æхсæнадон организаци «Вахтанговец» куы байгом, уæдæй. Йæ уæнгтæ æмæ йæ разамонæг Цæрикъаты Риммæйы фæрцы саразынц алыхуызон зæрдылдарæн мадзæлттæ. Сæ хъæппæрисæй та рацыд радон, Евгений Вахтанговы мысæн изæр. Скодтой йæ легендарон режиссеры цыртдзæвæы цур. Уырдæм æрбамбырд сты Ирыстоны театрты артисттæ, æхсæнады минæвæрттæ, стæй Щукины номыл театралон институты рауагъдонтæ, уыимæ Вахтангов цы гимназы ахуыр кодта, уыцы фæндзæм гимназы ахуырдзаутæ дæр. Евгений Вахтангов райгуырд æмæ схъомыл Дзæуджыхъæуы. Йæ сывæллоны бонтæй æмхиц уыд театрмæ. Архайдта алыхуызон драмон къордты. Гимназы фæстæ Евгений Вахтангов ацыд Мæскуымæ. Уым бындур сæвæрдта Щукины номыл училищæйæн æмæ Вахтанговы номыл театрæн. Вахтангов йæ фæстæ цы бирæ хорз хъуыддæгтæ ныууагъта, уыдонмæ ракæсгæйæ, зæгъæн ис цыма 100 азы фæцард. Евгений Вахтангов йæ цардæй ахицæн 39 аздзыдæй. Уыцы рæстæгмæ йын бантыст нæ Бæстæйы театры историйы ирддæр адæмы номхыгъдмæ бацæуын.
