Нæ республикæ суазæг кодта Цæгат Кавказы федералон зылды алы регионты педагогты
Дзæуджыхъæуы арæзт æрцыд мадæлон æвзаджы æмæ литературæйы æрыгон ахуыргæнджыты форум. Нæ республикæ суазæг кодта Цæгат Кавказы федералон зылды алы регионты педагогты. Форум цыди фыццаг хатт, æмæ нымад æрцыд ахуырады къабазы ирддæр цауыл. Бæлвырддæр хабæрттæ радзурдзæн Фидараты Маринæ.
Цæгат Ирыстон суазæг кодта мадæлон æвзаджы æмæ литературæйы æрыгон ахуыргæнджыты. Цæгат Кавказы федералон зылдæй 250 педагогы сæ кæрæдзийæн фæхай кодтой сæ фæлтæрддзинадæй. Хамзат Умхаев бындуронæй ахуыр кæны цæцæйнаг æвзаг. Йæ фарстатыл æмæ рæзтыл нырыккон æхсæнады. Форумы Цæцæны республикæйæ бацархайдтой 8 адæймаджы.
Форумы райдианы агъоммæ гимназ «Диалоджы» арæзт æрцыд республикæйы ахуырады æнтыстдзинæдты тыххæй равдыст. Фенæн дзы уыд 3D конструктор, национ уæлæдарæсы хуызтæ, стæй нæ республикæйы историйы тыххæй æрмæджытæ. Уæлдай цымыдисдзинад та сæвзæрын кодта Хабæты Альбинæйы мультипликацион æрмадз.
Форумы архайджытæн ма уыд ирон адæмы цардыуагимæ базонгæ уæвыны фадат. Уазджытæ федтой рагон æрмдæсныйады дæнцæгтæ. Уæвгæ Цæгат Ирыстон сси фыццаг республикæ, полилингвалон ахуырад царды кæм уадзынц. Скъолаты сывæллæттæ ахуыр кæнынц æртæ æвзаджы: уырыссаг ирон æмæ фæсарæйнаг. Уыцы фæлтæрддзинад хъæуы иннæ регионты дæр парахат кæнын, зæгъы форум саразæг Лариса Маршева.
Кавказы бирæвæрсыг культурæ. 16 мадæлон æвзаджы ахуыргæнæджы сарæзтой къордгай сесситæ. Афтæмæй сын фадат фæзынд мадæлон æвзаджы ахуыргæнæджы дæсныйадмæ уæлдай æргом раздахынæн.
Зæгъдзыстæм ма уый дæр, æмæ Цæгат Кавказы федералон зылды мадæлон æвзаджы æмæ литературæйы æрыгон ахуыргæнджыты форум арæзт кæй æрцыд фыццаг хатт. Йæ саразынмæ се вæрæн бахастой республикæйы ахуырады æмæ наукæйы министрад, Цæгат Ирыстоны паддзахадон педагогон институт æмæ Уæрæсейы адæмыхæттыты мадæлон æвзæгты Федералон институт.
Дыууæ боны æрыгон ахуыргæнджытæ архайдтой дæсныйадæвдисæг ахуырты, фембæлдысты конкурс «Мадæлон æвзаджы хуыздæр ахуыргæнæджы» призертимæ æмæ лауреаттимæ. Форумы хатдзæгтæм гæсгæ та рухс фендзæн йæ архайджыты раныхæсты æмбырдгонд.
