Горæты астæу иу бонмæ фæзынд æцæг спортивон фæз
Дзæуджыхъæуы арæзт æрцыд спортивон мадзал «Арм-Движ». Горæты астæу иу бонмæ фæзынд æцæг спортивон фæз. Штангæтæ, уæзæгтæ æмæ æндæр кусæнгæрзтæ, æмæ ма суанг спортивон хойрæгтæ. Сæ тых, хъару, спортивон цæттæдзинад æмæ фæлтæрддзинад равдисыны фадат дзы уыд алкæмæн дæр. Уыимæ куыд лæппутæн, афтæ чызджытæн дæр. Ерысы архайджытæ сæхи фæлвæрдтой уæзæгтæ исынæй æмæ æндæр фæлтæрæнты. Спортивон мадзалы кадджын уазджыты хсæн уыдысты – дунейы чемпион пауэрлифтингæй Хъыбызты Марат, дунейы чемпион бодибилдингæй Баскаты Алан. Уæвгæ та «Арм-движ» саразыны хъæппæрис разынд бодибилдер Плиты Аленмæ. Мадзалы сæйраг нысан уыд – фæсивæды хсæн æнæниз цардыуаг парахат кæнын. Се ппæты хъуыды дæр уыд иу – ахæм спортивон фæзы ма хъæуы дарддæр дæр æмбæлын.
