Нæ бæстæйы алы регионтæй 70 автомобилисты жюрийы размæ рахастой сæ машинæты фæлгонцтæ
Дзæуджыхъæуы арæзт æрцыд Уæрæсейы чемпионат автозвукæй. Нæ бæстæйы алы регионтæй 70 автомобилисты жюрийы размæ рахастой сæ машинæты фæлгонцтæ. Бæлвырддæр та – сæ мидæггаг хъомыс. Уæвгæ, ахæм ерысты æнæ техникон зонындзинæдтæй хъуыддаг размæ нæ ацæудзæн. Чи равдыста хуыздæр бæрæггæнæнтæ, уый базоныныл бацархайдта нæ уацхæссæг Томайты Батраз, æмæ йын ныхасы бар.
Цæгат Кавказы регионты хсæн ацы машинæ нымад у æппæтæй хъæрдæрыл. Сæдæ æхсай аст децибелы дæр ын рекордыл банымайæн нæй. Уый размæйы æнтыстдзинад командæ «Мастер Аудио»-йæн уыди дыууæ пункты дæлдæр – сæдæ æхсай æхсæз децибелы. Ацы хатт сын æрхаста уæлахиз нæ бæстæйы чемпионаты. Арæзт æрцыд Дзæуджыхъæуы. Максим Матвеев куыд зæгъы, афтæмæй алцæуыл дæр лæмбынæг бакуыстой: магнитофон, динамиктæ æмæ зæлтæ хъæргæнæнтæ.
Данил Коломенский автозвукмæ афтæ лæмбынæг нæ касти. Фæлæ рæстæджы цыдимæ йæ хъуыды аивта, æмæ ныр ацы хъуыддаг ахсы йæ царды стырдæр хай.
Уæвгæ, автозвук нæ республикæйы фæзынди дыууынæм æнусы кæрон. Фæлæ парахат кæнын райдыдта фæстаг азты.
Техникон спорты хуызтæм йе ргом аздæхта республикæйы разамынд дæр. Цæгат Ирыстоны Сæргълæууæджы хæстæ æххæстгæнæг Сергей Меняйлойы номæй регионты хсæн æхсæнадон организаци BTL-ы минæвæрттæн арфæйы фыстæджытæ радта регионы разамонæджы æххуысгæнæг Хъуыссæты Мæирбег.
Автозвукæй Уæрæсейаг чемпионаты аст къæпхæны уæлахиздзаутæ æмæ призертæ фембæлдзысты финалы. Уыдзæн Краснодары. Уым рахæсдзысты уынаффæ, кæй машинæ разындзæн хъæрдæр, фæлæ уыимæ æдасдæр æмæ нырыккондæр.
