Уæвгæ та ацы ерыстæ сты Цæгат Кавказы федералон зылды фыццаг бынат бацахсыны ерыстæм æвзарæн къæпхæн
Дзæуджыхъæуы арæзт æрцыдысты фыццаг бынат бацахсыны республикон ерыстæ каратэйæ. Цæмæй пандемияйы рæстæг алыхуызон дзыллон мадзæлтты нымæц фæкъаддæр кæной, уый тыххæй хаст æрцыд уынаффæ, дыууæ кары категорийы ерыстæ иу бон арвитын. Афтæ ерыс кодтой спортсментæ 10 азæй 13 азы онг, стæй 14-æй – 20 азы онг. Уæвгæ та ацы ерыстæ сты Цæгат Кавказы федералон зылды фыццаг бынат бацахсыны ерыстæм æвзарæн къæпхæн. Турнир цæудзæн ацы залы 14-æм февралы. Уый фæстæ та уыдзæн æппæтуæрæсеон турнир. Дарддæр Европæйы æмæ дунеон ерыстæ. Фылдæр баллтæ чи райса, уый фæулахиз уыдзæн. Къахæй ныхмæлæууæджы сæрмæ цæфæн дæттынц 3 баллы, корпусмæ -2 баллы, къухтæй цæфтæн та тæрхонджытæ дæттынц фæйнæ баллы. Уыимæ ахсджиаг у бæлвырд æмæ тагъд архайын. Зæгъдзыстæм ма уый дæр, æмæ ацы аз ахсджиаг у æппæт каратисттæн дæр. Ацы дисциплинæ фыццаг хатт архайдзæн Олимпаг хъæзтыты. Дзæуджыхъæуккаг турниры традицимæ гæсгæ сæ арæхстдзинад равдисдзысты æвзонг спортсментæ дæр. Ныртæккæ сæхи зæрдиагæй цæттæ кæнынц уцы ерыстæм.
