Цы инфраструктурæ дзы уыдзæн, ахæм ныры онг Цæгат Кавказы федералон зылды нæма уыд
Дзæуджыхъæуы аразынц ног физкультурон-дзæбæхгæнæн комплекс. Проект райста субсиди федералон бюджетæй. Комплексы уыдзæн алцыдæр, спортæй архайынæн, æмæ уый фæстæ фæллад уадзынæн. Цы инфраструктурæ дзы уыдзæн, ахæм ныры онг Цæгат Кавказы федералон зылды нæма уыд. Спорткомплексы фæрцы фæзындзæн 100 кусæн бынаты бæрц. Бæлвырддæр радзурдзæн Хъайтмазты Дзерассæ.
Куыстытæ объекты сæ тæмæны сты. Æрбахуыдтой бынæттон специалистты. Аразджытæ бавнæлдтой монолитон куыстытæм, райдыдтой инженерон хызтæ æвæрын. Физкультурон-дзæбæхгæнæн комплексы фæзуат уыдзæн 6 мин квадратон метры. Йæ инфраструктурæйы хуызæн Цæгат Кавказы федералон зылды нæ уыдзæн.
Ног центр ма лыг кæндзæн иу ахсджиаг социалон фарста. Фæнд кæнынц 100 кусæн бынаты бæрц скæнын. Арæзтад цæуы федералон проект «Бизнес-спринт» (Я выбираю спорт)-мæ гæсгæ. Уый у паддзахады æмæ бизнесы æмгуыстады дæнцæг.
Тренировкæтæ кæнынæн æмæ дзæбæхгæнæн процедурæтæй спайда кæнынæн уавæртæ се ппæтæн дæр сараздзысты. Пенсиисджытæн æмæ се *нæниздзинад хъыгдард кæмæн у, уыцы адæмæн, стæй фæкæсынхъуаг бинонтæй сывæллæттæн спорткомплексы сæ бон уыдзæн лæвар архайын. Афæдзмæ объект бабæрæг кæныны фадат уыдзæн 7 мин адæймагæн.
