Бæрæггæнæн мадзæлттæ кодта Цæгат Кавказы федералон зылды хъæбæр нозтмæ цæстдарæг регионты хсæн управлени.
Дзæуджыхъæуы арест æрæвæрдтой, спъирт кæмæ хæццæ кæны, ахæм продукци уадзæг куыстуатыл. Бæрæггæнæн мадзæлттæ кодта Цæгат Кавказы федералон зылды хъæбæр нозтмæ цæстдарæг регионты хсæн управлени. Ведомствæйы официалон сайты фыст куыд ис, афтæмæй æнæххæстбарджын æхсæнад «Марат»-ы цæстдарæн мадзæлтты рабæрæг кодтой, медицинон спъиртæй æмæ спъирт кæмæ хæццæ кæны, ахæм продукцийæ, хосты фсон кæй зилдух кодтой, ахæм цаутæ. Уымæй уæлдай ма дзы уыди æндæр æгъдаухæлдтытæ дæр. Уый хыгъд, куыстуаты директор ацы хъуыддаг схуыдта рейдерон æрцахст.
Завод уадзы, спъирт кæмæ хæццæ кæны, ахæм продукци. Контрафактон карз нозтимæ йын иумæйагæй ницы ис, зæгъы генералон директор Козырты Марат. Йæ ныхæстæм гæсгæ, 6-æм июны барадхъахъхъæнæг оргæнтæ рагагъоммæ æнæ фехъусынгæнгæйæ, æрбацыдысты æмæ заводы райдыдтой джигул кæнын, уый фæстæ йын йæ территорийæ ракодтой се ппæт кусджыты дæр. Уыимæ сын ахæм бар чи радта, уыцы æвдисæндартæ нæ равдыстой.Социалон хызты ис бирæ æрмæджытæ, адæм сæвзæрд уавæр схуыдтой рейдерон æрцахст.
Фæстæдæр куыд рабæрæг ис, афтæмæй куыстуаты территорийы æрмæст бынæттон барадхъахъхъæнджытæ нæ куыстой, фæлæ Цæгат Кавказы федералон зылды управленийы барадхъахъхъæнджытæ дæр. Куыстуаты генералон директор Козырты Марат æмæ йæ минæварæн афтæ дæр сæ бон нæ бацис, закъонмæ гæсгæ куыд æмбæлы, афтæ джигулы рæстæг бынаты уæвын, æмæ дзы цы цæуы, уый хи цæстæй уынын.
Тыхы структурæтæ ахæм хуызы сæхи кæй дардтой, уый у æнæзакъон, стæй сæ профессионалон æууæлтыл дзурæг дæр нæу, зæгъы адвокат. Барадхъахъхъæнджытæ фехæлдтой Уæрæсейы Федерацийы уголовон кодексы 182-æм статья. Ацы хъуыддагмæ официалон æгъдауæй ис иннæ рдыгæй æркæсæн дæр. Уæрæсейы карз нозтмæ цæстдарæг службæйы сæрмагонд сайты загъд ис, æнæххстбарджын æхсæнад «Марат»-ы цæстдарæн бæрæггæнæн мадзæлттæ куы уыди, уæд дзы ссардтой закъонхæлдтытæ. Бæлвырддæр та – дыууæ механизацигонд линийы, 60 мин авджы спъирт кæмæ хæццæ кæны, ахæм продукци, стæй 92 мин авджы та антисептикон хъацæн. Ист æрцыдысты ииуылдæр. Уæвгæ, ацы заводыл амæй размæ дæр уыди уголовон хъуыддаг. 2016-æм -17-æм азты сын ацы аххосæгтæм гæсгæ райхæлдой сæ кусæнгæрзтæ, стæй сæ байстой хомаг æмæ цæттæ продукци.
Слестгæнæн мадзæлтты 3-аг бон Козыры Мараты хъусынгæнинагмæ гæсгæ, æнæххæстбарджын æхсæнад кæны æхгæнгæ. Цы 40 адæймаджы дзы куыстой, уыдонæн ныр ис æгуыст адæмы статус.
