Æфснайæн куыстыты архайдтой студенттæ, волонтертæ, стæй районы цæрджытæ дæр
Дзæуджыхъæуы ацыд радон зиу. Æфснайæн куыстыты архайдтой студенттæ, волонтертæ, стæй районы цæрджытæ дæр. Активисттæ акалдтой зæронд бæлæстæ æмæ къутæртæ, ныссагътой ног бынтæ. Акци у æрвылазон. Куыстыты рæстæг фæсивæдæн цы бантыст, уый тыххæй радзурдзæн Тъехты Элинæ.
Æнæнизцардыуаг æмæ сыгъдæг уæлдæф. Дзæуджыхъæуы ацыдысты фæлладуадзæн фæзты сыгъдæггæнæн куыстытæ. Ирыстойнаг префекурæйы разамонæг Дзотты Ацæмæз цингæнгæйæ æрхъуыды кæны, йе мгæрттимæ – иу зиу куыд скодтой, уый. Куыд зæгъы, афтæмæй ахсджиаг у, цæмæй рæзгæ фæлтæр дæр ахæм мадзæлтты архайой, уый.
Хистæрæй – кæстæрмæ, хуымæтæг адæймагæй – хицауады кусæгмæ се ппæты дæр бафæндыд йе вæрæн бахæссын ахæм пайдайаг куысты. Цъæх фæзтæ æфснæйдтой республикæйы æппæт уæлдæрахуыргæнæндæтты студенттæ. Æдæппæтæй – 200 адæймагæй фылдæр. Семæ сæ разамонджытæ дæр.
Цъæх фæзтæ срæсугъдкæныны хъæппæрис фæзынд рагæй. Зæгъæм, Сапицкийы уынджы хъæдын – паркон зонæмæ зилынц 7 азы дæргъы (Лесопарковая зона).
Зæгъын ма хъæуы уый дæр, æмæ ныр нæ республикæйы цæрджытæн фадат фæзындзæн цъæх фæзтыл сæ мыггаджы ном сæвæрын. Хъæуы æрмæстдæр хъæугæ гæххæттытæ сæмбырд кæнын æмæ курдиат бадæттын.
Хъуыссæты Мæирбег, РЦИ-А сæргълæууæджы æххуысгæнæг: «Æрдзы рæсугъддзинад нын у Хуыцауæй лæвæрд. Уыцы рæсугъддзинад хъуамæ мах бахъахъхъæнæм. Фæсивæд архайынц æмæ рæсугъд кæнынц, нæ алыварс цы æрдз ис, уый. Хъуамæ бацархайæм, цæмæй нæ Ирыстоны рæсугъддзинад дарддæры фæлтæрæн адæттæм. Сыгъдæггæнæн куыстыты фæстæ алы мыггагæн дæр фадати уыдзæн, цæмæй сæ мыггаджы номæй срæсугъд кæной æрдзы фæндаг. Бацæттæ сын кæндзыстæм гæххæт, цæмæй йæ зоной, куыд кæнгæ у, уый».
Цы бырон æрæмбырд ис, уый аласдзысты сæрмагонд бынатмæ. Уым æрцæудзæн рекультивацигонд, ратдзысты йын ног цард. Фарон сæмбырд кодтой 200 машинæйы онг.
Милдзыхты Вячеслав, Дзæуджыхъæуы бынæттон администрацийы сæргълæууæг: «Абон замманай бон у. Нæ фæсивæд кусынц æмæ сын тынг дзæбæх уайы. Мах стæм хистæртæ æмæ хъуамæ нæ кæстæртæн мах амонæм раст зонд».
Æфснайæн куыстыты фæстæ фæсивæдæн фадат уыд хæрзад чъиритæй æмæ фыдызгъæлæй акомдзаг кæнын. Зиу кæндзысты алы сабаты. Бацархайæн дзы ис алкæмæн дæр.
