Сæ темæ уыди – наукæ æмæ наукон-техникон политикæйы республикон закъон куыд æххæстгонд цæуы, уый
Национ наукæйæн паддзахадон æххуыс, йæ райрæзт, æмæ ацы къабазы æнтыстдзинæдтæй ахадгæйæ пайда кæнын. Дзæуджыхъæуы ацыдысты парламентон байхъуыстытæ. Сæ темæ уыди – наукæ æмæ наукон-техникон политикæйы республикон закъон куыд æххæстгонд цæуы, уый. Парламенты сæрдар Тускъаты Таймураз куыд фæнысан кодта, афтæмæй наукæ у республикæйы социалон-экономикон рæзты фыццаг æууæлтæй иу. Æмæ йæ парахат кæныны фарстамæ абон æрдарын хъæуы стыр æргом. Байхъуыстыты фæлгæты Парламенты бындурыл равæрдтой алы институтты наукон æнтыстдзинæдты равдыст-презентаци. Архайджыты хыгъды, Уæрæсейы наукæты академийы Дзæуджыхъæуккаг наукон центр, Цæгат Ирыстоны гуманитарон æмæ социалон иртæстыты институт, Хетæгкаты Костайы номыл университет, стæй наукон æмæ ахуырадон куыстуæттæ.