Йæ рекультивацийы куыстытæ цыдысты 3 азы дæргъы
Дзæуджыхъæуы байгом хъæбæр хауæддзæгты куыстгæнæг полигон. Йæ рекультивацийы куыстытæ цыдысты 3 азы дæргъы. Ног полигон дзуапп дæтты экологон æдасдзинады æппæт нырыккон домæнтæн. Рацарæзты куыстытæн аргъ скодта республикæйы Сæргълæууæг Сергей Меняйло. Бынаты уыд не сфæлдыстадон къорд дæр, æмæ бæстондæр радзурдзæн Касаты Наирæ.
Рог дымгæ змæлын кæны цъæх кæрдæг, æмæ адæймагмæ афтæ кæсы, цымæ ам æндæр уавæртæ дæр никуы уыди. Афтæмæй та ма æрæджы дæр ацы бынæттæ бырæттæй зынгæ дæр нæ кодтой. Ивгъуыд æнусы хъæбæр коммуналон хауæддзæгтæ ластой ардæм. Дзæуджыхъæуы полигоны рекультиваци национ проект «Экологи»-йы фæлгæты райдыдта æртæ азы размæ. Бырæттæ уæд ахстой 72 гектары фæзуат. Ныр полигон йæ хуыз аивта. Йæ байгом кæныны мадзалы архайдтой республикæйы сæргълæууæг Сергей Меняйло, Дзæуджыхъæуы администрацийы разамонæг Милдзыхты Вячеслав, стæй экологи æмæ æрдзон æвæрæнты министры хæстæ æххæстгæнæг Бæззаты Вадим. Бæрнон кусджытæ аргъ скодтой æртæ азы куысты хатдзæгтæн.
Специалисттæ бырæттæ сæмбырд кодтой иу ран æмæ сæ бамбæрзтой хуырæй. Рекультивацийы кæронбæттæн къæпхæн уыди территори саив кæнын, газонтæ дзы байтауын, стæй алыхуызон къутæртæ æмæ бæлæстæ ныссадзын.
Сергей Меняйло куыд фæнысан кодта, афтæмæй республикæйы дарддæр цæудзæн экологон уавæр фæхуыздæр кæныны куыст.
Рекультивацийы бынатæн цыппар азы фæстæ скæндзысты экспертизæ, æмæ сбæрæг кæндзысты, территорийæ дарддæр куыд пайдагонд цæудзæн, уый. Гæнæн ис, куыд рекреацион кæнæ цъæх зонæйы хуызы.
