Проектыл куыст цыд фаронæй фæстæмæ, республикæйы сæргълæууæг Сергей Меняйлойы хæслæвæрдмæ гæсгæ
Ирон æвзаг зоныны æмвæзад фæбæрзонддæр кæнын, ног ахуырадон программæтыл бакусын. Дзæуджыхъæуы байгом ирон æвзаджы райрæзты центр. Проектыл куыст цыд фаронæй фæстæмæ, республикæйы сæргълæууæг Сергей Меняйлойы хæслæвæрдмæ гæсгæ. Бæлвырддæр радзурдзæн Хъайтмазты Дзерассæ.
Се ппæт сывæллæттæн зонгæ аргъау, уарзон хъайтарты диалогтæ…Æрмæст ныр зæлынц ирон æвзагыл. Мадæлон ныхас ныр сабитæ зонынц, сæйрагдæр та йæ – æмбарынц. Уымæн æмæ райсомæй изæрмæ, ахуырты дæр æмæ тезгъогæнгæйæ дæр, хъомылгæнджытæ семæ дзурынц æрмæст иронау. Цæмæй хатдзæгтæ хуыздæр уой, уый тыххæй сывæллæтты рæвдауæндон æнгом æмархайд кæны ныййарджытимæ.
Æппæт ахуырадон процесс рæвдауæндоны арæзт у хъазты хуызы. Афтæмæй сывæллæттæ æрмæг æнцондæр æмбарынц. Кæд сабитæн ирон æвзаг ахуыр кæныны хъуыддаджы æххуысгæнæг у хъомылгæнæг, уæд хъомылгæнджытæн сæхицæн та – ахуырадон æххуысчингуытæ. Ирон æвзагыл ахуыр кæнынæн æрмæст æй зонын фаг нæу, ахсджиаг у зонгæ кæнын ног методикæтимæ. Ацы фарстайы стыр æххуыс кæны ирон æвзаджы райрæзты центр.
Иронау ахуыр кæнынц æрмæст сывæллæтты рæвдауæндæтты нæ, фæлæ скъолаты дæр. Уымæн дæнцæг, Алайнаг гимназ. Ам, уырыссаг æвзаг æмæ литературæйæ фæстæмæ, æппæт предметтæ сты мадæлон æвзагыл. Суанг ма бæлвырд наукæтæ дæр ахуыр кæнынц ирон æвзагыл.
Сфæлдыстадон æмæ спортивон секциты дæр ахуыртæ сты ирон æвзагыл. Ахуырады хæрзхъæддзинадыл ахуыр кæныны ахæм модель хорзырдæм ахады. Рæстæгимæ рæзгæ фæлтæры *хсæн мадæлон ныхас фæхъуысы се *рвылбон царды дæр. Гимназы разамынд куыд зæгъы, афтæмæй æвзаг бахъахъхъæнын æмæ йæ райрæзт у стыр хæс. Æмæ йæ сæххæст кæнынæн æнæмæнг хъæуы æххуыс.
Цæмæй ахæм моделæн фылдæр хатдзæгтæ уа, уый тыххæй æдзух хъæуы йæ райрæзтыл архайын. Ныртæккæ ацы фарстайыл кусы специалистты æнæхъæн къорд. Архайы ахуырадон программæты æмæ методикон æххуысчингуыты ног фæлтæрыл. Ахуыргæнджытæм фæзыны фылдæр информаци, сывæллæттæм – фылдæр зонындзинæдтæ, республикæмæ та фылдæр гæнæнтæ æппæтæй ахсджиагдæр хæстæй иу æххæст кæнынæн.
Афтæмæй ирон æвзаг парахатдæр кæны. Æрмæст литературон уацмысты не мбæлы, дзуры йыл æрыгон фæлтæр дæр. Уымæн æмæ цалынмæ мадæлон æвзаг цæры, уæдмæ цæры адæмы хатт.
