Рацарæзты куыстытæ райдыдтой ивгъуыд аз, уыцы нысантæн радих кодтой 10 милуан сомæй фылдæр
Архитектурæйы цыртдзæвæн, стæй историон æмæ культурон объект бахъахъхъæнын. Дзæуджыхъæуы дарддæр цалцæггонд цæуы Тугъанты Махарбеджы номыл аивадон музей. Бæстыхай арæзт æрцыд 120 азы размæ. 1959-æм азы та сси музей. Ныртæккæ дзы ис 5 мин экспонатæй фылдæр. Рацарæзты куыстытæ райдыдтой ивгъуыд аз. Уыцы нысантæн радих кодтой 10 милуан сомæй фылдæр. Бæлвырддæр хабæрттæ радзурдзæн Тъехты Элинæ.
Цымыдисаг интерьеримæ галуан у Дзæуджыхъæуы рæсугъддæр бынæттæй иу. Бæстыхай 120 азæй фылдæр адæмы йæхимæ лвасы йæ рæсугъддзинадæй. Йæ архитектор Иван Рябикины ном кæддæриддæр уыд хъуыстгонд. Мидæгæй дзы цы нывтæ ис, уыдоны тыххæй бирæ легендæтæ цыд. Ома, дам, сæ италиаг адæм ныв кодтой. Иу хатт музейы кусæг Дзанайты Аллæ фембæлд дыууæ сылгоймагыл. Уыдысты, Прагæ æмæ Мюнхены чи ахуыр кодта, уыцы нывгæнæг Генрих Клузачекы чызджытæ. Уыдон Аллæйæн радзырдтой, Тугъанты Махарбеджы галуаны фæзтæ сæ фыд кæй рæсугъд кодта, уый.
Музейы коллекцийы фылдæр хай арæзт у ирон нывгæнджыты куыстытæй. Зындгонд сты Хетæгкаты Къостайы 23 куысты. Уыдонæй 18 фенæн ис аивадон музейы. Уæдæ дзы ис Тугъанты Махарбеджы 200 нывы, Дзанайты Азанбеджы æмæ сæ ахуыргæнинæгты куыстытæ дæр. Уæрæсейы нывгæнджыты хуыздæр цæдистæй иу у Цæгат Ирыстоны. Экспонаттæ хъахъхъæныны фарста ис фыццаг бынаты.
70 азы цы нывтæ фембырд кодтой, уыдон аккаг уавæрты не сты. Ацы фæз раздæр уыд хæдзары цæрджыты уат. Ныр та у, нывтæ кæм сæмбырд кодтой, уыцы бынат.
Уæдæ хъармгæнæн системæ дæр 120 азмæ базæронд æмæ йæ куыст куыд æмбæлы, афтæ нал кæны. Галереймæ цыдæр рæстæг цæуæн нæ уыд. Фарон меценаты ххуысæй сног кодтой цымыдисаг фонтан, республикæйы культурæйы руаджы та баивтой бæстыхайы сæр. Ныр та специалисттæ бавналдзысты галерейы цалцæггæнæн куыстытæм. Сног кæндзысты бæстыхайы æддаг бакаст, декор, стæй баивдзысты рудзгуытæ.
Фыццаг уæладзыджы цы фæз ис, уый сцалцæг кодтой меценаты ххуысы руаджы. Ис дзы видеоцæстдарды æмæ зынгсирвæзты ныхмæ системæтæ. Фæлæ дыккаг уæладзыджы экспонаттæ хъахъæд не сты æмæ сын тæссаг у.
Тугъанты Махарбеджы номыл аивадон музей сног кæнынмæ йæ кусджытæ æмæ специалисттæ къахдзæвтæ кæнынц æмæ зæрдæ дарынц, иннæ фарстатæ дæр лыггонд кæй æрцæудзысты, ууыл.
