Премьер-министр куыд загъта, афтæмæй ныртæккæ, паддзахадон программæтæ æмæ национ проекттæ æххæст кæнгæйæ, нæ регионы царды уадзынц фæндаггон хызы ахсджиаг мадзæлттæ
Дзæуджыхъæуы хидты æмæ доны былгæрæтты фидаргæнæн конструкциты техникон уавæрыл æрныхас кодтой, Дзанайты Барисы разамындæй æмбырды. Премьер-министр куыд загъта, афтæмæй ныртæккæ, паддзахадон программæтæ æмæ национ проекттæ æххæст кæнгæйæ, нæ регионы царды уадзынц фæндаггон хызы ахсджиаг мадзæлттæ. Аразынц æмæ цалцæг кæнынц фæндæгтæ æмæ хидтæ. Уыцы объекттæн ис стыр ахадындзинад. Арæзт сты республикæйы цардаархайды æмæ цæрджыты удæнцойдзинадæн. Профилон структурæты сæйрагдæр нысан у æппынæдзухдæр Дзæуджыхъæуы æмæ республикæйы æппæт районты объектты техникон увæрмæ бæстон цæстдарын. Уый фадат ратдзæн алыхуызон фыдбылызтæй бахизынæн, стæй республикæйы цæрджытæн æмбæлгæ уавæртæ аразынæн. Дзæуджыхъæуы администрацийы сæргълæууæг Милдзыхты Вячеслав куыд фехъусын кодта, афтæмæй специалисттæ сбæрæг кодтой 6 автомобилон хиды. Хатдзæгтæм гæсгæ, объекттæ сты цалцæггæнинаг. Уымæй дарддæр ма хъæуы былгæрæттæ сфидар кæнын. Дзанайты Барис бабар кодта сæрмагонд куысты пъланыл бакусын, æмæ объектты проектон-сметон документаци скæнын. Ахæм куыст бакæнын хъæуы æппæт районты дæр.
