Проект у, абарæн кæмæн нæй, ахæм. Йæ фæрцы бæстыхайы уыдзысты æнцонвадат уæттæ æмæ æмбæлгæ инфраструктурæ
Дзæуджыхъæуы йæ тæмæны бацыд ацæргæ æмæ инвалид адæмæн хæдзар-интернат аразыны куыст. Проект у, абарæн кæмæн нæй, ахæм. Йæ фæрцы бæстыхайы уыдзысты æнцонвадат уæттæ æмæ æмбæлгæ инфраструктурæ. Ныртæккæ специалисттæ кæнынц аивгæнæн куыстытæ. Арæзтады министрады куыд зæгъынц, афтæмæй ацы объект бацæудзæн Уæрæсейы хуыздæр куыстуæтты хыгъдмæ. Арæзтад цæуы, национ проект «Бинонты» федералон проект «Хистæр фæлтæр»-мæ гæсгæ. Хъайтмазты Дзерассæ радзурдзæн бæлвырддæр.
Арæзтады æппæт къæпхæнтæ æххæстгонд цæуынц тагъд æмæ бæлвырд. Ацы блоктæй иуы нысангонд цæуынц фидæны медицинон кабинеттæ. Сæвæрдзысты дзы нырыккон ифтонггæрзтæ диагностикæйæн æмæ дзæбæх кæнынæн.
Ацæргæ адæмæн æмæ инвалидтæн республикон хæдзар-интернаты бынат уыдзæн 200 адæймагæн. Ис дзы куыд æхсæвæй-бонæй уæвыны фæтк, афтæ боныгон стационар дæр. Комплекс баиу кæндзæн 6 блокы: цæрæн агъуыстытæ, медицинон корпус æмæ техникон зонæ. Уыдзæн хицæн агъуыстытæ хи найæнтимæ, хæрæндон, гæрзтæхсæн, фæлладуадзæн зонæ, стæй актон зал æмæ библиотекæ – æрвылбон цардæн алцыдæр.
Бæстыхæйтты тыгъдадтæ уыдзысты райдзаст æмæ уæрæх, панорамон рудзгуытимæ, стæй ахуыртæн æмæ фæллад уадзынæн зонæтимæ. Ам фæзындзæн реабилитацийæн æмæ дзæбæхгæнæн физкультурæйæн тренажертæ. Сæрмагонд æргом проекты здахынц æнцонвадат тыгъдады домæнтæм.
Арæзтад райдыдта нацпроект «Демографи»-мæ гæсгæ. Ныр æй дарддæр хæццæ кæны ног нацпроект «Бинонтæ» æмæ программæ «Хистæр фæлтæр». Куыстытæ куы фæуой, уæд центрæн йæ бон суыдзæн Уæрæсейы хуыздæр профилон кусæнуаттæй иу суæвын.
Арæзтадон фæзы æрвылбон фæллой кæны 90 специалисты онг. Фæвæййынц мидаивгæнæн куыстытæ агъуыстыты, инженерон хызты æмæ рудзгуыты монтаж. Уыцы иу рæстæг райдыдтой территори аив кæнын.
Арæзтад райдыдта 2024-æм азы уалдзæджы. Объект сцæттæ кæнын фæнд кæнынц иннæ аз. Ног хæдзар-интернат суыдзæн социалон инфраструктурæйы ахсджиаг хай.
