Йæ байгом кæныны кадджын мадзал арæзт æрцыд Цæгат Ирыстоны базарадон-экономикон колледжы бындурыл
Дзæуджыхъæуы райдыдта 8-æм регионалон чемпионат «Абилимпикс» профессионалон арæхстдзинадæй, йе *нæниздзинад хъыгдард кæмæн у, уыдоны *хсæн. Йæ байгом кæныны кадджын мадзал арæзт æрцыд Цæгат Ирыстоны базарадон-экономикон колледжы бындурыл. Конкурс у æвзарæн. Хуыздæртæ Цæгат Ирыстоны кад хъахъхъæндзысты Мæскуыйы национ чемпионат «Абилимпикс-2024″-ы. Бæлвырддæр радзурдзæн Хъайтмазты Дзерассæ.
Хъæлдзæг зарджытимæ, национ кæфтытимæ æмæ зæрдæхæлар ахастдзинадимæ байгом президентон платформæ «Уæрæсе – гæнæнты бæстæйы»-йы 8-æм регионалон чемпионат «Абилимпикс» профессионалон арæхстдзинадæй. Архайынц дзы, йе *нæниздзинад хъыгдард кæмæн у, ахæм адæм.
Чемпионат «Абилимпикс» байгом кæныны кадджын мадзал бабæрæг кодта Хицауады сæрдар Дзанайты Барис. Федта алы равдыстадон палаткæ дæр. Бацæттæ сæ кодтой республикæйы ахуыргæнæндæттæ, стæй куыстдæттæг компанитæ. Премьер базонгæ рæзгæ фæлтæры сфæлдыстадимæ æмæ æрмдæсныты амынддзинæдты методикæтимæ. Колледжтæй иу Дзанайты Барисæн балæвар кодта бисерæй быд дзуары ныв. Премьер радзырдта, республикæ цавæр æххуыс кæны фæсивæдæн, сæ хыгъды, се *нæниздзинад хъыгдард кæмæн у, уыдонæн дæр.
Кадджын мадзалы архайдта ахуырады æмæ наукæйы министр Алыбекты Эллæ дæр. Радзырдта, йе нæниздзинад хъыгдард кæмæн у, уыцы фæсивæдæн æххуысы гæнæнты тыххæй.
Чемпионат гом кæныны бон фæзы уыд æцæг бæрæгбон. Зын бауырнæн у, фæлæ бон размæ колледжы уыд коммуналон авари. Мадзал æндæр бонмæ нæ ахастой. Доны хæдзарады республикон куыстуаты минæвæрттæ, стæй колледжы кусджытæ сæ сæргъы директор Æбиты Валерий афтæмæй, æмбисæхсæвмæ иуварс кодтой хæтæл кæй атыдта, уый фæстиуджытæ. Æххуыс кодта ахуырады министры хæдивæг Габеты Вадим дæр. Алцыдæр афоныл конд æрцыд. Зæгъын ма хъæуы уый, æмæ мадзалы равдыст бацæттæ кæнынмæ йе вæрæн бахаста инвалидты æппæтуæрæсеон æхсæнады регионалон хайад дæр.
Фыццаг конкурсон бон райдыдта 9 сахатыл. Базарадон-экономикон колледжы фæзы ерыс кæнынц «Хæринаг кæныны» æмæ «Ирон чъиритæ фыцыны» компетенциты. Хойрæгтæ цæттæ кæнынц рæстæгмæ, чемпионаты экспертты лæмбынæг цæстдардæй. Кулинарон компетенцитæ традицимæ гæсгæ цæуынц базарадон-экономикон колледжы лабораториты. 5-æм профессионалон училищæйы та тыхджындæрты рабæрæг кæндзысты «Рог машинæтæ цалцæг кæныны» компетенцийы. Чемпионат «Абилимпикс» ахæсдзæн 4 боны. Архайынц дзы республикæйы æппæт районтæ. Ерыстæ уыдзысты 12 фæзы. Конкурсанттæ архайдзысты хæрдзиуджыты 33 комплекты рамбулыныл.
